'YMA leh TUNLAINA'

- Lalzuitluanga

          Tunlai khawvelah mi kan buai tlang ta hle mai. Mahni hna, eizawnna hrang hrang, thil

pawimawh leh \ul tak tak buaipuiin kan hmanhlel a, a tu a te pawh hian pawipang kan ngah em em vek tawh mai. A bik takin \halai ten aia upate zahna chang kan hre thar deuh deuh a, awm awl tak leh hman em em thei reng mai nih te zah nachang kan hre tawh. Enge ka tih ve theih a, enge ka thawh ve ang? tiin tih hreh leh thawh hreh nei hauh lovin kan buai ta chur chur mai zawng a nih hi! Hei ang hun kan tawng hi hmasawnna ropui tak a ni a, thil lawmawm tak a ni bawk. Chutih rual chuan buai hi chhuanlamah a lo hman theih viau mai tih erawh kan hriat tel a \ha hle awm e. Tunlai chhanah mi buai lo chu engah mah an hmantlak tak tak tawh lo ti ila kan sawi sual tamin a rinawm lova, a sa seh tak takah chuan a buai a te bawk hi a laktlak chu an ni leh nge nge \hin. Kan hriat hnu vek mah ni sela sawi nawn leh inhrilh nawn fo a \ul leh \hin avangin YMA lam han thlurbing ta ilangin.

          YMA a inhmang hman lo leka buai kan nih chuan kan inngaihtuah chian a ngai khawp ang. Tumah hi hman vanga inhmang kan awm lova, hman lo chung chung pawha kan inhmanna leh kan theih ang tawk kan hlan ve hian  khawtlang tan rah \ha a lo chhuah reng zawk \hin. Entirnan, kar liamta lawkah YMA Day chu tluang taka hmang zovin intihsiakna te pawh tluang takin neih zawh a ni a. Chutih rual chuan kan Branch a YMA Member awm zawng zawng zat ngaihtuah chuan thawkchhuak kan tlem tih phat rual a ni lo. Football Tournament te pawh kan siam a, kan chhuak leh luih luih tho mai. Chutiang zelin Kohhran hrang hrang \halaite chetchanna hrang hrangah kan tel leh hman tho si! Engvanga YMA te hunpui ber, kan Ni ve ngawih ngawih puala Section hrang hrang intihsiaknaa tel hman lo nge kan nih? Kan tuina a ni emaw, ni lo emaw, kan ngai pawimawh tawk lovin kan theih tawk kan la hlan lo deuh a ni mai. YMA in hma a lakna kawng hrang hrangah hian tha kan thawh ve \hin tur a ni a, a dik lohna sawi fak fak tur kan hria a nih si loh chuan kan thlawp ve tur a ni dawn lawm ni? Nge ni a, thlawp ringawt kha kan duhtawk ta mai zawk? Lengkhawm zai leh lam kan zir hman lo a ni thei e. Amaherawhchu, kan inkhel hman lo phal meuh lova, Kohhranah kan inhmang hman lo ngai chuang hauh lo! A zawng zawnga inhmang turin kan in fuih a ni lova, amaherawhchu, kum khata vawi khat he hun lo thleng \hin pual hian mahni hna \ul kalsanin nula te pawh i rim lo ngam ve ang u kan ti mai zawk a ni! Kohhran mite vek kan ni a, YMA hi kan ta vek a ni bawk. Kohhran leh YMA hi pawl thuhmun ni hauh lo mahse a chhunga chengte hi mi thuhmun kan nih avangin kan kal kawp tir thiam ngei ngei tur a ni. Kan tunlai khawvel changkang zelah hian kal hran tir phet tum leh inhnek rem tir hreh tlat kan kat ta nuk mai niin a lang a. Kan inenfiah \heuh pawh a pawimawh hle awm e.

          Engvangin nge YMA ah hian kan inhman \hat duh loh fo \hin? Eng hian nge YMA a tel ti hlimawm lova, ti thlamuanawm loh ta ang? A lang a paua sawi ngam mang si lo hian kan inhman loh chhuanlamah a ruk a ralin hruaitute kan dem leh nak nak hlawm lawi si em ni? A dik pawh a dik ang. Hruaitute hi mi famkim an awm lova, an \hat bik vang te, an tlin bik vang leh an fel bik vanga hruaitu ni hi tumah an awm hauh lo nia! YMA chu a zau lutuka, mi chi hrang hrang kan leng hian a ti khawlhkham zo kan ti em ni? Ngaihtuah chiang rawh, YMA ai chuan Kohhran hi a zau zawk daih ania! Hruaitu ten zu an rui buk buk kan ti maw? Heti zawng hian ngaihtuah ve mah teh. YMA huang chhunga zu ruih bung bung inthlahrunawm tur khawpin rui lo hai lo a te hi kan inhmang taima tawk em? A rui rui hi a inhmang \ha peih peih an ni lawi si em? Hun pui lo thlen chang leh chhiat \hatah member rui lo hai lo te khawnge kan awm zawh leh diak \hin? Kan kal dan diklo leh fel lo lai awm te siam\ha tur hian YMA hi kan luhchilh meuh em? tih te hi inzawt fo \hin ang u. Kohhran chu Kohhran nge nge a ni a, YMA hian Kohhran a nek ngai lova, a hringtu a nih miau avangin a nek ngai bawk hek lovang. Tin, Kohhran chetchanna hrang hrang ngaihtuah chuan YMA chetchanna te chu bei tham tak a ni. Chuvangin buai hi a zawng a za in chhuanlamah hmang lo ila, YMA chetchanna leh Kohhran chetchanna hi indipdal leh intibuai tham a awm lo hrim hrim tih te hi i hre thar leh teh ang u.

          Mizo kan nih chhung chuan YMA hi mamawh lo kan awm lova, kan awm ngai hek lovang. A hmang thiam leh chhawr thiam apiangte tan a \angkai zel mai dawn a ni. YMA hi tu ta bik mah a ni lova. 'I TA, KA TA, KAN ZAVAI TA' a ni tih hi kan hriat thar leh a pawimawh takzet. Neitu chan changa a then thianghlim kawngah te, a chhawr \angkai kawngah te, a siam\hat kawngah te hian kan zavaiin mawh kan phur vek a ni tih i hria ang u. YMA kan sawi hnawn a, \huthmuna hruaitute kan dem ngawt hian mahni leh mahni kan inkawk a, kan mawng kan hlim a ni tih hria ila. Hruaitu thlannaa tel ngai mang si lo, hruaitute sawisel peih leh em em si nih te; YMA hmalakna kawng hrang hranga tha thawh ve duh hauh si lo, a sawisel lam erawh peih viau si nih te hi zah nachang i hria ang u. Kan che chhuak peih lo a nih pawhin a ti peih te tal hi chu i tawng tawh lul lovang u khai! Kan tel lo pawhin YMA hi chu a kal zel tho tho dawn. Amaherawhchu, YMA hian 'tlawmngai pawl' a nih angin kan kut lo chu kut dang a nei bik reng reng lo a ni tih hi i hre nawn mawlh ang u.

          Rev. Vanlalzuata chuan, “Kan \hatlai hun zawng zawng ruih nan leh nawmsip bawl nan kan hmanga, kan han thi ta cheng a, kan ruang Kohhranah kan thehlut leh lawi si. Lalpa hian kan ruang ringawt a duh lo, kan nun kha a ni a duh ni” a lo tih angin kan vanglai, kan \hatlai hun hi YMA tan kan hlan ve tur a ni dawn lawm ni? Kohhran leh khawtlanga kan rawngbawlna kawng tinrengah leh hmalakna kawng tinrengah kan \hatlai leh kan chak em em lai hian in\awiawm tlang dial dialin hma han la ho dial dial thei ila. Tichuan, RAMHLUN VENG hi 'NANG leh KEI' hian veng dangte awh ngawih ngawih, veng inlungrual leh \angrual, veng nuamah kan siam leh thei dawn a lo ni reng zuk nia!