Ka Pa, anni hi ngaidam rawh

Thupui : Ka Pa, anni hi ngaidam rawh

Chhiar tur : Luka 23:34

                                                                                                                                                -Rev.Thangzauva

Kan thupui,'Ka Pa,anni hi ngaidam rawh' tih hi Lal Isua Kraws-a an khenbeh laia a thusawi pasarih zinga pakhat a ni. Sual reng reng hre lo leh thil tihsual nei lovin amah khengbettute tan a Pa Pathian hnenah ngaihdam a  dilsakna a ni.

1. Kraws-a khengbettute dinhmun:

            Persia-ho chuan lei chu Pathian siam a ni a, Van pawh Pathian awmna a ni an ti. Chuvangin misual thi tlaka an ngaihte chu lei si lo, van si lovin Kraws-ah an khengbet thin. Rom-ho chuan Rom mi ni lo -bawih leh sal te, tual that te, suamhmang te, phiarruk hmang te, khua leh tui nihna phatsantu te leh hel hote hrem nan Kraws an hmang thin. ( John L.Mc Kenzie, Dict.of the Bible. p.161). Mosia dan chuan 'Thinga khai apiang Pathian anchhedawng a ni si a' a ti (Deut.21:23). Kraws chu dam lai pawha thi tlaka an ngaihte hremna hreawm leh zahthlak bera an ngaihte thihna hmun a ni. Kraws-a khenbeh ve mi pakhat  chuan,"Keini zawng hrem zia reng kan ni, kan thiltih man chauh hmu kan nih hi" a ti a ( Lk.23:41). Pilata pawhin a sualna a hmu chuang lova; chuti chungin Kraws-ah khenbeh a ni. Zawlnei Isaia chuan," Kan khawlohnate avangin vuak thitlinin a awm ( Isa.53) a ti.

2. Ka Pa, anni hi ngaidam rawh:

            Vawi khat chu Nigeria rama Tualchhung indo laiin mi pakhat hi a nung chungin phum an tum a; amah phumna  tur 'thlan' an laih tir a. A phumtute chu anchhia a lawh nasa hle a ni an ti. Kan Lalpa chu amah khengbettute tan a tawngtaisak a, "Ka Pa, anni hi ngaidam rawh, an thiltih hi an hre lo a nih hi,' tiin (Lk.23:34). Rom-ho danah chuan mi an khenbeh chuan,' Ka thihna hi ka thiltih sual tlanna ni rawh se' tia tawngtai tura ngaih an ni. Isua erawh chu mi dangte sual tlan nan a thi a. 'Ka Pa, anni hi ngaidam rawh' tih hi a Grik tawnga a awmze diktaka lehlin chuan ,'Ka Pa, anni hi ngaidam rawh tiin a tawngtai mawlh mawlha' tihna a ni. Kraws-a khenbeh a nih lai pawh khan Isua chuan mite sual ngaihdam an nih theih nan a tawngtai avangin Kraws-a khenbeh mek a dinglama mi chuan Pathian ngaihdamna a chang a, Paradise-ah a chawl nghal. Chu Pathian Fapa thihna chuan kan sual kaidum ber pawh a silfai ve nghal thei: 'Kan sualte thupha kan chawi chuan kan sualte ngaidam tur leh, kan fellohna zawng zawng tlengfai turin amah chua a rinawmin a fel a ni (1Jn.1:9)

3. Pathian ngaihdamna chuan hmangaih Pathian a nihzia a tilang:

           

            Tirhkoh Paula chuan,'Kan bawhchhiatnate min ngaidam a; batna lehkha,thupeka ziak kan chunga awm, min dodal thina chu a thaibo tawh si a. Chu ngei chu Kraws-a khengbetin a lakiang ta a, a ti ( Kol.2:13,14). Min ngaidam chauh pawh a ni lo; misual thiam loh chang tawh hnu kha thiam min la chantir zui cheu nia! Bawhchhiatna sual avanga thiam loh chang tawh hnu,'thiam lo hmin der hnu' kha a Pa Pathian hmaah kan aiawha dingin thiam kan chan theih nana min sawisaktu a ni. Thiam chantirtu kha Krista a ni sia a, tuin nge thiam loh chantir ang? Thil tisualtu thiam chantir hi mihringin a ti thei lo. Sawrkar rorelna Court pawhin a ti ngai lo. Keini erawh chuan ukil ropui Isua Krista, min sawisaktu kan nei. A hming pawh 'Remruattu Maka! (Wonderful Counsellor) a ni. Chuti taka hmangaih avanga nunna min petu chu hla siamtu pawhin," A hmangaihna a chak a ni," a ti thlawt. Hla siamtu dang pawhin a sawi thiam dan berin - 'Chuti takin min hmangaiha' a ti. Hmangaih avanga misual ngaihdamna hi sawifiah phak a ni lo.

                                             'A hmangaih thukzia puang turin,

                                              Seraf-te pawhin an phak lo' (KHB.No.184).

4. Pathianin min ngaidam ang bawkin, midangte kan ngaidam ve tur a ni:

            Missionary ropui C.T. Studd-a (1862-1931) chuan " Isua Krista hi Pathian a niha, ka tan a thi a nih si chuan a tana inhlanna thuk lutuk a awm thei lo," a ti. Mi dangte tana inpekna thuk zo a awm thei lo. Lal Isuan tawngtai dan min zirtirnaah chuan," Kan chunga thil tisualtute kan ngaidam angin, nang pawhin kan thil tihsual ngaidam ang che," a ti. "Mi an bawhchhiatte in ngaihdam chuan, in Pa vana miin a ngaidam ve ang che u. Nimahsela, mite in ngaihdam siloh chuan, in Pain in bawhchhiatte a ngaidam bik lo vang". Biang lehlama bengtu chu lehlam pawh dawh rawh a la ti ta zel a ni. Thil tisualtuin ngaihdam a dil chuan vawi sarih hmun sawmsarih (7x70=490) ngaidam turin min zirtir ; a tul zat zat, vawi engzat pawh tihna a ni a. 'Pathianin Kristaa a ngaidam che u ang bawkin nangni pawh inngaidam ve rawh u' tiin Tirhkoh Paula pawhin min hrilh bawk. Isuan mi a ngaihdam chu a theihnghilh thak, a hre zui ve ngai lo.

            Khengbettu, sawiseltu, sawisatu, tihchhiatvek duhtu, tihhlum tumtute Isuan a tawngtaisak,"Ka Pa, anni hi ngaidam rawh" tiin. Pathian ngaihdamna changtute hian mi dang kan ngaidam ve tur a ni a, chu chu Isua rilru, hmelmate hneh dan tha ber a ni.

                                                   Lalpan a thu malsawm rawh se.