THALAITE U...

Kumthar thuchah

-Rev Thangzauva

Synod Moderator

          Hun leh kum chunga thuneitu Pathian chuan kum 2012 chu a rawn herchhuahtir leh ta mai a. Phu leh vang leh theihna vanga thlen tur ni sela tuman he kum thar hi kan daikai zo lovang. Pathian khawngaihna avang liau liaua thleng thei kan ni a; chuvangin a hnenah lawmthu i sawi ang u. Tlang tin leh mual tina Kristian |halai awm zawng zawngte Pathian hmingin Kumthar Chibai ka buk vek a che u.

          Kan Thalai hruaiten kumthar thuchah ziak tura min sawm avangin ka lawm hle a. He kumtharah hian heng thil te hi i ngaihtuah thar leh ang u.

1.   Mi vannei tak ka ni: Vanglai nun pawh hmang thleng zo lova mi tam takin mual an liam tawh hnuin, nang leh kei chu Pathian khawngaihna changin hun tharah hlankaiin kan awm a. I \hat lai hun, i vanglai ni hmang theia i awm hi vannei tih i inhria em? Pathian \anpuia, Pathian rawngbawl turin, nun petu tana inpekna hun remchang a siamsak che u a ni tih i hria em? Chhan neiin min hruai thleng a ni tih hriain, kan nun chhan, kan dam chhan tihhlawhtlinna hun \ha pek kan ni hi a vanneihthlak hle. Hmang \angkai ang aw.

2.   Kan vanglai hun a rei dawnlo: Mihring nun rei zawng - kum 70/80 vel hi Bible chuan chhum reilo te lo lang a, ral leh thuai \hin ang te, pangpar vul chuai leh mai \hin ang te, hlim ral leh mai \hin ang tein a tehkhin a. Kristian |halai nih hun chhung kum (14-40) hi a ral thuai dawn. Hun rei lo te i la neih hi hlim takin, engthawl takin, lungawi takin, \angkai leh hlu takin hman tum hram ang che. Tum mumal neiin, inchhir leh tawh lohna turin i thiltih zawng zawngah Lalpa hriatna telin hmang la, i la lawm ngei ang.

3.   Fimkhur takin aw: Mahni taksa leh nun atana \ha lo tur pawh dawn lêk lova mahnia nun tichhia a, thihna hruihruallin a zem buaina kara leng mi tam tak an awm lai hian, nang erawh chuan i nun leh hun fimkhur takin hmang la, i la inchhir lehna tur thil \ha lo chu engmah ti suh. John Bosco-a chuan,"|halaite awh duhna ber chu thatchhiatna thang hi a ni" a ti a. Thatchhiatna lakah inveng tlat la,'Ka peih lo,' tih nei suh ang che. 'I zuan hmain i zuanna tur en zet rawh,' tih hi hriat reng tur a ni. Tihdam aiin inven a \ha zawk si a. He kum thar hi mahni nun siam \hat nan, hmasawn nan, 'mahni in re-treat' nan i hmang ang hmiang.

4.   Sual lakah inthiarfihlim rawh: Sual tinreng laka inthiarfihlim turin Pathian thu chuan min hrilh a, thupek a ni (I Thess.5:22). Tihchhina \ha lo brt chu sual tih chhin hi a ni. Chawhmeh tem chhin a ang lo. 'Ti suh, ei suh, insuh, khawih suh,' tih te hi chhin a \hat loh avang a thupek (order & warning) vek a ni. Mahni leh midang \hatna tur pawh huam tela thupek hlu tak a ni a; zawm chu malsawmna, zawm loh chu anchhia - Eden huana Evi leh Adama te tlûk anga tlûk vé-na a ni. Zu, Drugs, sex leh ruih theih thil dang laka kan inthiarfihlim theih phawt chuan mahni kan inthunun thei tihna a ni a, khawpui latu aiin chutiang mi chu an ropui zawk. Mahni tana \halo tur chu ti duh suh - bumna thang a ni.

5.   Taksa in Pathian chawimawi rawh: Tunlai khawvel ngainatu Dema chanchin chu a chhe zawnga sawilan \hin a nih laiin Daniela, Josepha, Mosia etc. chu entawn atan sawi lan an ni \hin. Sadraka, Mesaka leh Abednegoa-te anga Pathian tan nun hlan huamin, he kan taksa, mana lei hian Pathian i chawimawi ang u (I Kor. 6:19,20). Kan taksa ngei hmanga Pathian rawngbawl hi amah kan chawimawina ani si a, 'Kan aw Amah fak nan, an kut chak lo puih nan,' tih kha i theihnghilh suh ang u.

6.   Kohhran, ram leh hnam ro hlu i nih theihnghilh suh: Chhungkua, Kohhran, khawtlang, ram leh hnam nghahfak a ro kan ni tih hi \halaite hian theihnghilh suh ang u. J.Edger Hoover-a pawhin, "|halaite hi a thlawna hnamin a neih ro hlu berte an ni," a ti. Kan ram leh hnam, kan chhungkua, Kohhran leh khawtlang nun tinuamtu tur, a chhe lai siam\hatu, thil \ha lo siam\haa, kawng dik kawhhmuhtu kan nih hi hre rengin thil \ha tia entawna insiamin hma i sawn zel ang u.

7.   Entawntlak nun: Khawi hmunah pawh, engtik lai pawhin sakhaw mi dik tak, Pathian \ih mi, tihtakzeta Pathian chawimawi leh be \hin hmuh tur an awm zel. Pathian \ih mi, mi dik leh rinawm chu miin a rukin an zah a, an entawn reng. Ei leh in, zuk leh hmuam, silh leh fen - leh nun dan phungah te 'min entawn rawh u' tih nuna nung \halaite zingah engzat tak awm ang maw! Kan hna thawhna \hreuhah entawn tur show thei ila, mawhphurhna leh tih tur tuk leh pek \ha taka tih lamah rawngbawlna a nih hriain ke pen leh hram thei ni phei ila, Krista inpekna rim a nam lehzual dawn an ni

          Chutichuan, kum 2012 kan lo thlen hian he kum hian engnge a rawn her chhuahpui dawn kan hre lo. Billey Graham-a chuan,"Hun lokal turin engnge a kawl hre lo mah ila, hun lokal tur chu Pathianin a kawl tih ka hria," tiin Pathian kutah a innghat tawp mai. Keini pawhin kumin hian engnge kan tawng dawn kan sawi thei lo. Davidan,"Pathian kutah tlu lut phawt mai ila..." a tih ang khan a hnenah i inhlan tharzel ang u.

'Damchhung mi hmuak apiang,

I tirh ni se'