DUHTHLANNA

Deut: 30:19; 1 Kor. 6:12

K. Lalrammuana

Duhthlanna awmzia: Pathian thil min pek hlu ber chu 'Nunna' a ni a, a dawtah chuan 'Duhthlanna' hi a ni. Duhthlanna kan tih chu rilru leh ngaihtuahna hmanga thutlukna kan siam hi a ni ti ila, kan sawi sual awm love. Thlan tur thil chi hnih emaw a aia tam emaw kan buk hnua kan duh ber kan thlan chhuah hi a ni ber awm e. Kan thil tih leh kan awm dan tam ber hi duhthlanna kan siam a\anga lo awm a ni fo \hin a ni.

Duhthlang thei Mihring: Nicholas Spark-a lehkhabu ziah, a movie pawh a awm kha 'The Choice' ah chuan heti hian a inziak a. 'Nun thuruk' tia  a sawi chu 'Duhthlanna' hi a ni a, thil  tê ber leh ho mai mai-a kan ngaih leh a lian ber thleng hian kan nun siamtu an ni a. kawng dik leh dik lo min zawh tir thei tu vek an ni" tiin.

"Tin, LALPA Pathianin Ieia vaivutin mihring a siam a, a hnarah chuan nunna thaw chu a thaw lut a; tichuan mihring chu mi nung a lo ni ta a (Gen. 2:7)." Heta "Mihring chu mi nung a lo ni ta" a tih awmzia berah chuan - Mihring te hi mîze nei, mahni inefiaha thil tih tur insiamsak thei a ni" tiin zirmi te chuan an sawi a. Rilru leh duhthlanna hmanga mahni awmdan tur relfel thei tur leh mahni duhzawng tlang theia siam kan ni. Chu duhthlan theihna chu mihring te min ti Mihring-tu pawh a ni.

Kan Bible chuan Pathian hmangaih tur leh a aw ngaithlaa, thihna aia nuna, anchhia aia malsawmna thlang turin min ti a (Deut. 30:19-20). Chu chu Pathian ngeiin a mite a sawmna a ni. Hei hian chiang taka a tarlan chu mihringte hi duhthlanna thiang tak hmanga kan hma lam awm dan tur rel fel theia siam kan ni, tih leh kan duhthlanna siam dan hian kan hma lam awm dan tur thui tak a hril, tih hi a ni.

Duh taka min siamtu Pathian hian a duh zawng ti tur leh amah ring turin min dang bet lo va, min nawr lui hek lo. Duhthlanna pawh hmang thei lo lêka mihringte nawr lui \hin Pathian ni se, a duh zawng leh a kawngte thlang turin min ngen min ngen lo vang tih a chiang em em a ni.

Duhthlanna leh mawhphurhna: Heta hriat tur thil pawimawh em em mai pakhat chu mihringte hian duhthlanna zalen kan nei... kan tih a vang hian kan duh duh tih a thiang tihna a ni lo. Khawvela kan awm chhung chuan dân hnuaia leng kan ni a, mi dangte tana harsatna thlen tur leh kohhran khawtlang tana hnawksak tur khawpin duhthlanna zalen tak hmang tura inngaih tur a ni lo. "Thil engkim tih ka tan a thiang a, nimahsela thil engkim tih a \ha kher lo; thil engkim tih ka tan a thiang a, nimahsela eng bawihah mah ka inphal lo (1 Kor. 6:12) ".

Tunlai khawvelah \halaite ziangah mahni duh dang anga awm theia ni a inhre tlat, duhthlanna zalen awmzia hre fiah thiam lo mi kan pung tual tual mai. "Zalenna ka nei a, right ka nei a lawm, ka duh duh ka ti ang a, ka duh duh danin ka nung ang, tuma lo sawi ve phak a awm lo" ti pang pang tawk lah kan bang lo. Hag. 1:5-7 ah khan kan kawng zawh lai kha chhut ngun \hin turin min hrilh a. Heng mite hian zalenna an chawisang fû a angin an lang a, mi dangte zalenna erawh an ngaihpawimawh sak lo \hin. "Keimah hi kawng leh thutak leh nunna ka ni; keimaha kal lo chu tumah Pa hnenah an thleng ngai lo (Jn. 14:6)" tiin a sawi leh a. Duhthlanna zalen kan nei tih vanga duh duh dana sapatal ngawt thei kan ni bik lo a, duhthlang tura zalenna kan neih hi kan hman thiam loh vaih chuan lungngaihna kawr ruama min hnûk luttu a ni thei a ni tih hi kan hre reng tur a ni.

Kan mawhphurhna leh duhthlanna kan hriat rual chiah hian kan duties kan hre tur a ni. Chhungkua, hnathawhna, \hian ho leh pawl hrang hrangah te a ni ang chu. Jak. 4:17 ah chuan "Tupawh thil \ha tih tur hriaa ti si lo chu a tân sual a ni" a ti a. Mite nuih zat ni lo tur leh nachang hre turin Pathianin duhthlanna min pe a, chu chu kan hmanthiam loh chuan kawng dik leh ngil zawh a har \hin a ni.

Tlangkawmna

Duhthlanna siam dik lo leh thutlukna dik lo siam hi a pawi tak zek a, a pawizia a lan chhuah meuh chuan a tlai lutuk fo \hin. Chutih rual chuan duh kan thlan dik loh avangin tuarna leh hrehawmna, harsatna kan chungah a thleng a nih pawhin indawm kuna, Juda Iskariota anga hrui hrual chuh mai lovin, engkim mai hi tawp ta vek angah kan ngai tur a ni lo. Tirhkoh Paula chuan “Pathian duhzawnga lungngaihna chuan chhandamna tura simna a thlen a, chu chu inchhirawm lo tak a ni” (2 Kor. 7:10) tiin a sawi a.

Ruah sur zawha ni eng mawi tak a lo lang \hin ang hian hrehawmna te, harsatna kan tawh te hi Pathian hmel min hmuh tirtu ni zawk se la, a hnena min hruai kirtu atana hmang hlauh turin duhthlanna dik kan siam leh thei a ni tih hi i hre reng ang u. Amen.