Rev Thangzauva
Kraws hi Phoiniki-ho tihchhuah niin an sawi. Kraws hi chi thum awmin an sawi a: Andria Kraws (X), Anthoni Kraw (T) leh Latin Kraws (+). Isua khenbehna kha Latin Kraws hi niin sawi a ni. Rom- ho chuan Rom mi ni ve lo - sal te, tualthat te, suamhmang te, phiarrûk hmang te leh khua leh tui nihna phatsantute khenbeh nan Kraws hi an hmang \hin.1. Misual thihna kraws Pathianin a thlang : Thinga khai apiang chu Pathian anchhedawng a ni (Deut. 21:23). Thil mak leh chhinchhiahna zawng kher \hin Judate tan chuan Kraws-a Pathian fapa khenbeh nia sawi chu rin ngaihna a awm lo; chutiang bawkin sual khawvela Pathian Fapa Kraws-a khenbeh chu finna zawng \hin Grik-te tan chuan thu atthlâk a ni.
Mifing mihrinna paihthlaa, remhre remhriatna paihthlak tumtu chuan Kraws chu a thlang miau si. ‘Mi fing mihrinna hianin, A ngaihtuah chhuak zo lo a che, Ka chhandamtu i thurûk hi’ tiin Pu Chawngkhupa pawhin hla a lo phuah a ni. Thuhril atthlâk hmanga ringtute chhandam hi Pathian chatuan thiltum a ni.
2. Nunna leh Chhandamna kraws chu : “Kei lei ata khaikanin ka awm chuan, mi zawng zawng keima hnenah ka hîp ang” (Joh. 12:32) titu Krista chuan Kraws thihna hmangin nunna leh chhandamna min pe (Joh. 3:14,150. Kraws chuan ringtute chu khawvél nen a tihrang ta a. Kraws chu ringtute tân Kraws chhuanawm a lo ni ta (Gal. 6:14). Khawvél nen an inkhengbet tawn ta a ni.
3. Kraws chu inremna a ni : Kraws-ah chuan palai \ha famkim Krista chuan remna sa-ui a rawn tan a. Van leh khawvel inkara inzawmna chat tawh chu a rawn suihzawm leh ta. Pathian nen kan inrem leh ta. A va lawmawm em! Chu Kraws chuan mihring leh mihring inkarah te, mihring leh thilsiam inkarah te remna a rawn siam ta. ‘Kalvari-ah an dang chuang lo ve’ tih angin, hausa leh rethei, mipa leh hmeichhia te pawh Kristaah chawhrualin kan awm. A va hlu em! Chu remna hmun Kraws a\ang chuan thil thlir ila, krista chu chawimawiin a awm ngei ang.