To Him...?

Ka thian duh tak, ka lehkhathawn che hi i hmuh hunah chuan he khawvelah hian ka awm tawh lo a  ni maithei, ka lo la awm a nih pawhin tlangval lengrei, vengchhung nula tlangval ten hnung lam atanga an nuih, fiamthu thawh nana an hman kual vel mai mai ka lo ni anih pawhin min dem hauh lo ang che. Ka hmangaih ber thinlung ka luah zawh loh avanga hetiang dinhmuna awm ka nih avangin ka chhung ril nun hi a kehsawm vek a, mahni inthat ngainepa hmusit em em tu hi hruihrual kher lovin ka inthat mek zawng a nih hi.

Min hre lo anih pawhin mak ka ti vak lo ang, i pawm lai; ka hmangaih ber tan pawha - 'hmâna ka ngaihzawng thin a nih saw' tih sawi zahthlak khawpin hmangaihna hian min vawchhia a, hmangaihna awm ring lo tu hi hmangaihna vangin ka thi mek zawng a nih hi. Hmangaihna hi a awm a, Pathian atanga chhuak hmangaihna ni lo mihring leh mihring inkara hmangaihna pawh hi a awm tak zet a ni tih a hnen atang khan ka zirchhuak a. Chuvangin, nang chuan hmangaih tak leh dim dawih tak, keh thei dawmin lo dawm ang che.

Hmeichhe  duhawm leh mi dawhtheihna ngah tak, ka nu ang hiala ka en thin a nih avangin a lakah khan ka lo pangchang thin hle a ni tih tun hunah hian ka hrechhuak a, achang chuan a ni khan a hrethiam lo fo thin in ka hria. Mahse, ka sim thei chuang si lo. Nang chu patling takin awm la, a tan leh an chhungkaw tan mi chhenfakawm, an innghah tlak nih tum tlat ang che aw.

Thil pakhat ka chah duh leh che chu, a ni kha kawng engkimah ngaipawimawh la, i awmna leh i tihtur engkim kha hrilh vek zel ang che. A rilru leh ngaihtuahna a rilin a hmathlir a zau em em a, thil ti tura i duh a, a thiam zawng a nih phei chuan phur takin a tihsak ngei ang che, hei vang hi a nia ka ngaihsanin ropui ka tih em em nachhan chu. Buai chung chung pawhin a ngaihpawimawh em che a ni tih lantir a duh ang a, i tan a theih ang tawk tawkin hun insiam rem a tum hram thin ang a, chu chuhaider lul lo ang che.

A tawp berah chuan hmeichhe nem leh no tak, hmangaihna leh mi hriatthiamna ngah tak i pawm a ni tih kha inhre reng la, thu engpawh sawi se, a ho emaw ho lo emaw pawh nise, tha takin ngaihthlak sak hram ang che. Hmangaihna a ngah tluk zetin mi hriatthiamna pawh a nei a, heng avang chauh pawh hian a rilru ti na lo hram ang che. A rilru i tina a nih chuan, a ngaidam ngei ang che, mah se nangmah zawk khan hrehawm tihna leh inthiam lohna i nei kumkhua tawh ang. Khawvela mipa vannei bera chhiar te zingah kei chuan ka chhiar tel ngei ang che. Hre reng la ka duh chu, khawvela hmeichhe duhawm ber i nei hi inchhuang hle ang che. Misual leh chetsual theihna lakah veng him la, ramtuileiloa a awm a nih pawhin kal san lul lo ang che.

Ka hun neih lai khan a tan thil hriatreng tlak hnutchhiah engmah ka nei lo a, rilru natna leh hrehawm tawrh bak engmah ka pe lo tih chiang takin ka inhria, khang te avang khan ka inngaidam thei lo a, ka mittui ti tlatu a ni fo thin. Nang chu i van nei em em a, hun tha i neih lai leh a hnua i inchhir loh nan ka awm dan anga awm ve lo turin ka duh che a ni. A rilru tinaa, a mittui ti tla tu ni lovin, hlimna leh lawmna thlensaktu nih tum zawk ang che aw.

(PS: I kalsan a nih chuan a tan ka rawn ding ngei ang le)