Hringnun khawvel

HRINGNUN KHAWVEL

Dt. 25.05.2014

Chaw ei kham hrawk tang vel a tla thla nghak ni awm takin Veradah-ah chuan ngawi rengin ka ding a, zial zu khu hlarh hlarh pah chuan chite lui kawr vel chum zingin a bawh chuk mai chu ka thlir a. Fiamthua a Paihte ho khual zin tiau chum; lapua emaw tia an zuang thla te pawh in ti hre chhuak rum rum a, vei nuih sak pah chuan sava chiar nuaih nuaih chu ka ngaihtuah chhunzawm a.

Chhum kara thingbuk lo langah chuan Vamur leh Chawngzawng riah buk sualin ka awmna tur ti niawm fahran hian an hram ri nek nek a, chu chuan ka lung a ti leng tlat pek a. Kan inhnuaia Vamur lawi tur chak tak tak a thlawk fua fua te chuan an nun zalen bik zia chiang tak hian a tarlang a. Inhnuai luah te mah nise an thikawm rum rum hian ka hria.

Chutia ngawi renga ka din lai chuan lungtla ni awm tak hian ka thinlung chu a nghilh dup mai a. Ka hun tawng leh ka awm dan, mite hmaa ka \awng zawng zawng te chuan thawk leh khatah hrehawmna nasa tak min siam ta a. Ka \awngkam ka umphak loh zia te, fing leh rem hria ni a ka inngaihna te chuan nasa takin min vaw let a. Ka vawiin hun hman dan te ka ngaihtuah letin, mite hnenah huaisen takin nun dan \ha leh awm dan mawi, a dik nia ka ngaih ka zawm theih miah loh tur te huaisen tak maia kan sawi paip piap te chu mitthlaah a chama, mahni mawnghlim ang mai ka ni, hnar hmuhlen a awl hle mai, (mahse darthlalangah kan en zuai a, a lo lian em em bik chuang lo a takah chuan) chu chuan zahna leh mahni insitna namen lo min siam a, hlimna hi khawiah nge a awm tak? tia thinlung rum vawng vawng chung chuan heng sava te hian an inkarah inhmuhthiam lohna leh buaina hi an tawk ve \hin an gem le? Tih chu ka ngaihtuah a.

Chu tih lai chuan lungte hrual tur awm se aw ti awm hmel deuh hian kan hawi kual vel ruai a, ka hmuh mai loh avang leh inchhungah ka awm tih ka inhriat chhuah rual rual chuan peih leh peih lo chuan taksa in sira a hnawl ho chu kan paihchhuak ta ngheng mai a. Ngawi reng chuan ka \hutung luah a, e chunga \awng zuah zuah thu va awm suh! Ek in bangah chuan ka pa hian lehkha ziak hi a tar a, chu thil intarah chuan “Aw Lalpa, he khawvel hi ka khualzinna ram a ni tih mi hriatnawntir fo la…”  tih thu chuan ka lung a kuai kher mai.

Ka chenna, hmun nghet tur nia ka lo ngaih he Zoram ar hmai tiat lek hi thlahlel leh duhthawh taka ka lo awm ve na chu kan khual zinna ramah min chhuahsak ta mai chu! hriatthiam harsa ka ti lek lek a. Amaherawhchu, Lal Isua ring tute tan chuan he khawvel aia nuam leh ropui, lungngaih mangan, hrehawmna leh thihna, hmangaih ten min kalsan tawh lohna tur van in ropui chu min siam sak chu thlirin, chu hmun chang tur chuan he khawvel hi min lo tem tir ve zuai chu niin, ‘Lei chu leiah, vaivut chu vaivutah’ tih ang khan Pa hnena haw leh tur kan nih zia ka hrechhuak a. He kan khual zin kawngah hian khual zin khawhar tak kan ni em? Khawvel kan cham chhunga kan nun dan, kan thil tih \hat leh \hat loh ang zelin ro rel sakin kan la awm dawn si a.