ABC FULL FORM

Rom 14:11, Sam 57:1, Tirh. 16:31

A = ADMIT

Damdawiin ah kan awm tawh em? Kan dam loh chuan Doctor ten damdawi inah min admit thin ti rawh u. Chutiang bawkin kei mahni pawh kan dam loh emaw, kan rilru te a nat emawin Pathian hnenah kan tlu lutin kan in admit thin tur a ni.

Tunlaia natna anga an chhiar, rilru lam natna ‘Depression’ te hi thangthar te zingah a mikhual lo hle mai. Tleirawl/Rawlthar tam takin he natna avang hian an nunna an chan phah tawh a, Kristian naupang/thalai inti te tan erawh chuan thihpui tham erawh a ni chiah lo. Lal Isua khan rilru lam damna hi a ngaipawimawh em em a, he khawvel a rawn kal lai pawha atih dam tam tak te zinga mi chu rilru lam dam lo, Ramhuaizawl te, Kaih te, mahni inthiam loh naa khat te, rilru hah leh a dang tam tak te a tidam a ni. Natna reng reng hi dam tur chuan a kaihhnawih thil zawng zawng a dam tel a ngai a. Rilru taksa leh thlarau inzawm dân leh an dam kim a ngaihzia hre tu Isua hi tidamtu ropui, rilru lam damna ngaipawimawhtu, rilru lam doctor ‘Psychiatrist’ ropui ber chu Lal Isua Krista hi a ni.

Kan nitin hun hmanah ka piangthar tawh ti reng chung siin sual bawiah kan tlu leh palh thei, ti sual leh bawhchhia, ngaihdam tlak loh, chhungte huat rawn anga inngai tawh pawh ni la, a ni chuan a hmangaihna leh khawngaihna tawp chin nei lo chuan min lo ngaidam dawn si a. A chhandamna chu a bo dawn lo mah se, he taksa thi thei hi chatuan atan a boral thei tih hriat tur.

Tin, ngaihzawng inkarah a ni emaw, chhungte nena kan buaina, inhmuh thiam lohna te pawh thleng thei a ni, khawvel lamah hahdamna, hahchawlhna zawng lovin, Pathian hnenah thlu lut ila, in admit ila, A hnenah kan rilru natna te leh rilru hahna te kan thlen thin tur a ni. Heng harsatna leh beidawnna kan tawh changa kan himna tur chu Pathian chauh hi a ni. Amaha kan in admit rualin kan thinlungah hian Pathian tan hmun siamin admit ve bawk ila, a hmun laili leh nuam ber chantirin A nin min lo chhawk thin dawn a ni.

B = BELIEVE

Pathian kan ring theuh em? Kristian sakhaw bia kan nih angin kan ring tur pawh a ni. Amaherawhchu, rin tawk hi a har thin. Vawi khat chu Biak In pakhatah hian ruah a sur ngei theih nan tawngtai rual an nei a, a tukah Biak In-a an kalkhawm chuan ruah sur ngei theih nana tawngtai mipui zinga mipa naupang pakhat te chauh hian nihlip a rawn keng a ni...an ti. Hei hi rinna chu a ni. Kan duh leh mamawh a chhia a tha, awm leh mawi pawh dawn lovin A hnenah kan thlen a, a lian ber atanga a te ber thlengin kan thlen tur a ni reng a ni... Overall Pathian kan nei tih hriat reng tur. Mahse, kan Bible chuan “Pathian chu thlarau a ni; a chibai buk tututen thlarau leh tih tak zetin chibai an buk tur a ni” (Joh. 4:24) tiin a sawi a. Kan biak hi kan chiang tur a ni, nam nûl chi a ni lo.

Tawngtaina hi chi thumin an then thin:-

1.   Aw – Kan thil dil te a chhanna kan hmu nghal mai thin.

2.   Nghak rih rawh

3.   Aih, ni lo e...ti te in.

Rilru mangang leh nun tui hal, Pathian mamawh ngawih ngawih a inhriain a hnenah kan duh leh mamawh te kan thlen a, mah se tuifinriata lungte thlak ang maiin a ngawi leh vung vung lawi si. A beidawn thlak thin a ni ti rawh u. Heng avang hian a lawm ‘Atheist’ Pathian awm ring lo tu te an lo awm tak thin ni. God’s not dead movie kha kan en tawhin a rinawm – Pathian awm ring lo tu khan Pathian a haw tlat, Pathian hi a awm ngei a ni tih tichiangtu pakhat a ni.

Tun hnaiah Lal Modi-a sawrkarna hnuaiah ‘Yoga’ chawi lar tumna nasa takin a awm a. Compulsory Teaching of Yoga in Educational Institutions Act, 2014 chu July 11, 2014 khan official Gazzette-a tih chhuah a ni. Hman ni lawkah pawh UNO 69^th session ah – Historic Day-ah pawh a zuk fak chiam kha. He pa hi chu aw... a bon a ni.

Mahse, lo dawnsawn dan chin tawk kan neih a ngai. Yoga hi Sanskrit tawng YOGA atanga lak chhuah a ni a, a awmzia ah chuan inzawmna/inpumkhatna tih te pawhin a sawi theih ang. Rilru ngaihtuahna fim tak hmanga mahni taksa inthunun tel chungin mi mal thlarau leh a biak thlarau (Universal Spirit) nei tura inhmanna a ni. Yoga in a tum ber chu mihring pangngai kha an pathian (Brahman) a inchiah pilin, inpawlna neih a, a hnena hruai thlen a, mihring thlarau (Jiva) leh pathian (Brahman) nena inzawm tir, inpumkhat tir, pakhata siam a ni.

Hindu te hmalai puithuna âtthlak tak hi keini kristian te tan chuan tih a rem ve lo, Hindu te ram zauh tumna hmanraw pakhat a ni. Yoga hian school chi hrang hrang 11 lai a nei a, an inzirtir dan pawh a hrang awm e. Hei an tawngtai ten ‘Om’ an tih reng zel hi.

                          Om           –   Mantra tihna a ni a.

                          Mantra    -   Hindu, Buddhist, Jain ten an Pathian hnena an hlan thianghlimna tawngka, thusawi thin a ni.

Chuvangin tih tur nge tih loh tur ni ang le, tih reng reng loh tur.

Kan pengthui tep, sawi zui a chakawm mah se. Vawi khat chu naupang te hian chemte hi a khalh a, a nu in a va hmuh chuan a laksak ta a. Chemte ngenin tap tuar tuar mah sela a tana thil tha lo a ni tih a hriat tlat avangin a nu chuan a pe duh lo. Pathian pawh hian kan tana tha lo tur chu ngen ngawlin bang lovin tap chungin dil mah ila, min pe kher lo tih hi kan hriat a tha.

Kan rilru buai mangan ber laiin a ngawih tlat, induh hun i van hre tak tih paha melh rawm rawm te pawh a chakawm thin, mah se bang lova tawngtai a, amah bel tlat tu chu vawi leh khatah a dilna chhanin awm nghal mai lo mah se, a dam chhung emaw, a thih hnuah emaw chhanin a awm thin. Chhan loh chang te pawh a nei ang. A remruat hi tuman kan hrefiah phak si lo.

Thil engkim kan tih dawnin Pathian rawn chung zelin ti ila, A mah ring tlat chunga eng thil pawh kan tih chuan kan hlawhtling em em ang. Kan lehkhazir naah a ni emaw, kan nitin hun hman naah eng thilah pawh ni se A mah hre chung rengin kan ti tur a ni. Mihring rilru hi a lian awl thin a, dah len loh tur a nih chu.

C = CONFESS/CONFESSION

Thilsual la ti miah lo kan awm em? kan ti vek tawh awm e, ti suh an tih mawlh mawlh laia lo tih luih talh...ang chi te..maw... Pathian mit hmuhah chuan sual lian leh sual te hi awm thei hian ka ring lo a, engpawh chu ni se, thil sual kan ti a nih pawhin kan lei pathian hmuh theih, kan nu leh pa emaw Pathian hnenah kan inpuang tur a ni ang. An tia lawm, vawi khat chu nula pakhat hi a V.day gift thla thum hnu velah a hmu puar ta pang mai a, a rilru a hah hle mai, lungngai taka in dawm kun rengin awmzia a nei lo tih hriain inchhir leh lungchhe em em in Pathian hnenah ngaihdam dilin a tawngtai a “Ring tawk, tah aw tuau chuan ‘Lalpa’.... ‘ka rai a’ a ti thawp saih e...an tia lawm. Sual puan hi thil harsa leh hrehawm tak a ni meuh mai. Mah se kei mahni kan inphawrh thawl loh chuan mahni intih hlum te hial thleng thei a ni. Hmeichhe ho ngat phei chu an tawng tak tak phei chuan thaw miah lovin min 3 an tawng thei....an ti.

Eng ang pawhin kan sualna, kan thil zep ruk te hi thup tum eng ang mah ila, lan chhuah hun a la awm dawn tho tho. Eng tin nge kan Bible in a sawi kha (Mt. 10:26, Mk. 4:22, Lk. 8:17, 12:2) “Lang lo tura thuhruk engmah a awm si lo, hriat loh tura zep pawh engmah a awm hek lo” tiin Chanchin Tha bu 3 ten an sawi vek a ni. Kan dam chhungin he khawvel ah lang chhuak lem lo pawh a ni thei, mah se nang leh kei hi chatuanin kan nung reng dawn lo, Pa hnenah kan chanchin hi puan zar a la ni dawn tho. Chuvangin he zahna kâwnah hian tlang nel leh zahna lungngaih thlak i tawh loh nan kan nitin nun i hmang fimkhur ang u.