Kohhran Chakna

KOHHRAN CHAKNA

Kohhranhote hian ‘chak leh nung’ nih kan duh \heuh a; hmunhma leh Biak In \hate, hall leh thil hrang hrang a chang tlunna lam hi ‘chak’ tehnan kan hmang ta emaw tih mai tur a ni. Helam kan dah pawimawh ta lutuk hian kan rilru a hruai sual palh ang tih a hlauhawm thei ta hial a ni. Heng thilte hi Kohhran mamawh, a lova kan awm theih lohna vek a nih avangin a \ha apiang chu duhthusam a ni ngei mai; hetih lai hian rualawh luat vanga mahni phâk loh neih tum Kohhran kan pung tawlh tawlh erawh hi chu in-en \hat kan ngai ta niin a lang.

Kohhran hian Building leh hmanraw \ha aiin Member-te hi kan thil neih (asset) pawimawh ber a ni tih kan hai palh ang tih a hlauhawm khawp mai. Kohhran chakna chu member-te inpumkhatna hi a ni a, inpumkhatna atana hmanraw pawimawh ber chu inngaihsak tlanna hi a ni; Pathian a\anga chhuak hmangaihna dik taka in\huikhawmnaah chuan member-te an lawm tlang  \hin. Hruaituten building \ha aiin Kohhran member-te kan ngaihpawimawh hmasak a\ul a, member-te inlungrualna hmunah chuan hmuh theihin Pathian kuthnu a lang nghal \hin a. Kohhran-a Committee hrang hrangte hian member-te hi kan awm chhan an ni tih hriain anmahni ngaihsak hi kan hna hmasa berah dahthei ila a duhawm hle. Biak In leh Hall \ha taka thawl deuha awm ai chuan, chhe deuh zawk pawh ni se a chhûng luah khattu awm hi a hlu zâwk daih a; chutiang Kohhran chu Synod thlenga kan chakna thahrui an ni.

Kohhranin “rawngbawltu” a tih te zinga mahni nihna hre lo kan awm \hin hi a pawi khawp mai. Kohhran chakna leh hmasawnna ti-\huan-awptu kan tlingphak a ni. Rawngbawltu inkhawm taima Kohhran ban leh thahrui pawimawh an ni a, Kohhran member lam pawh chutiang tho chu kan ni. Hruaitute kan phûtna a san viau laiin an hmuh leh biak phakah kan awm em tih te pawh in-en ila; Kohhran hruaitu leh rawngbawltu \ha kan neih theih nan i \awng\ai tam lehzual ang u. Pathian Kohhran hi Upate ta ni lovin ‘kan Kohhran’ titu apiangte ta a ni a; a chhiat a \hat thuah te, a nawm leh nawm loh thuah pawh member zawng zawngin mawh kan phur theuh tih i hre thar leh ang u.