Kan thawhhlawh

Zakaia'n "Lalpa, ka sum zatve pachhiate hnenah ka pe ang," a tih hunlai a ta tawh kha sum hi lo hlu hle tawh. Lal Isua ngei pawh cheng Sawmthum (30) in an hralh a nih kha. Mahni hlawh chhuah ni lo, awlsam deuh taka sum kan hmuh hi chu a hman ral lam pawh kan chak fu; mahse mahni thawh chhuah ngei mai hi chu kan rohin kan uikawm pui leh viau lawi si a.

He khawvel lungngaihna, tahna leh manganna khawvelah hian nawmsak duh avangin khawvel hausakna kan thlahlel a, hausakna hian lungngaihna nge nawma a thlen tam zawk ang le? nitin eichawp zawng nge hlim a, mi hausa pui pui te hi le? Sum leh pai hian hlimna te hi lei thei sela a ropui ngawt ang. Rethei tan tahna, hausa tan lah hlimna a awm tak tak chuang si lo, mahse hausak chu kan chak vêk lawi si a, lungngaih kan châk tihna a ni chuang hauh si lo. Tam tak chuan kan thawh hlawh hi he khawvelah hian kan la dawng tak tak in an ring lova, kan lemchan hlawh hlir tem kumtluan turah kan inngai thin. Kawng hnai leh nuamsa kan zawnna lamah kan bo fo bawk thin. Mi duham te tan sum leh pai ringawt ngaihtuahna hmun leh hun a ni a, pachhiate aiin an nun pawhsei a ni bik chuang lo.

Zir tur hlir in a khat a, zir peih miah lo te pawh an nung ve thova, taima tan thawh sên loh a awm a, thatchhia te pawh an dam khaw chhuak ve tho si; mahse khawvêl a ni miau va, a hmang tha duh deuh tan vanneihna, a chhe deuh tân chuti hlauh.

He khawvelah hian hlawh chuah loh chanvo kawltu an awm ang em tih ka ngaih tuah ihin. Kan nih dan a piang mai leh kan dinhmun a piang mai hi kan chunga thleng awm tak leh kan nihna tur awm tak theuh niin ka hre thin. He khawvel hi mi fing ber leh mawl ber chen za na a ni a; mahse kan chunga roreltu hian mâwl tak leh dik takin min hrut rual a, chu chu roreltu chuan kan thawh a piang hlawh a, kan thawh loh pawh hlawh tîr zêl a tum tlat a ni. Sum hmuhna tur nei lo chuan retheihna a hlawh chhuak ngei bawk ang. Leilung pian chhuah pui, nihna dik tak chu tlansan ngaihna a awm lo.

Zirlai te pawh an zirlai tha tak a an tih chuan kum tawpah an thawh rah chu an seng thin ang bawk hian Office kal te, kuthnathawktute pawh nise, an hnaah an rinawm a, tha takâ an thawh chuan an hlawh chhuah chu anmahni bak têl tur dang an awm chuang lo, hlimna leh lawmna thuruk chu an mahni in an nei thin. A kawtawpa kan tan tak tak hun, a pawimawh lai takah hian a ni kan hlawh chhuah khawvel a kan thawh hlawh hian min rawn umphak thin ni. Lehkhazir te, kut hnathawh te leh thil dang hi chu a mal mal hian a hlawh chhuah chi a ni tih kan hre deuh vek mai.

Mahse, kan tih sual na tam ber chu he hlawh chhuah khawvelah hian hlimna chu ramri nei, chumi ramri han thlen tawh chuan hlimna khawvela cheng tura inngaihna awm thin leh he hlawh chhuah nun hi chawlhhahdam san hmiah thei tur anga kan inngai hi a ni. Sum kan ngah zawngin engkim mai hi a fel duak mai ang tiin ngaihruatna kan han nei a. Chu kan ngaihruatna chu tipuitling turin kan han che tak tak a sum chu a lut nangiang mai. Mitthlaah chuan in lianpui sak a, chu inchhungah chuan chhungkua hlim taka nuih ho dar dar an tum ve ang. Mahse nun dik leh rilru dik te, taimakna te hi Khawvel suma leingawt theih mai a ni lo a, intih hlimna engpawh lei thei mahse muttui na chu a lei theih der si lo. Chaw tui ber ber lei thei mahse an sum chuan chaw ei tuina a lei thei tawh hek lo. In lian puiah a huho in an khawhar ngawih ngawih thin a ni. Ramri nei a kan ngaih hlimna, engtik emaw a lo thleng tur lah chu a lo thleng tawh ngai si lo, kan thawh hlawh chu kantel thin mawle.

Mahse kei chuan heng mite lemchanna khua hi a sei ka ti lutuk. Khawvel hian an lemchan hlawh chu pe in lo ngaithiam mahse, ropuina Lalpa chuan an thawh hlawh chu a pe tho in ka ring thin. He hlawhchhuah khawvel ka ngaihtuah chang hian Pathian hian ka nunkhua hi a rel  thiam ka ti thin, kan thawhchhuah ang mil zel hian kan chungah a malsawmnain min vur thin a ni si a.