RINNA "Rinna chuan hmalam hun a thlir ṭhin"

Hebrai 11 : 22

Rinnain Josefa chuan a thih a lo hnaih khan Israela thlahte chhuah tur thu a sawi a, a ruhte kawng thuah thu a pe bawk a.

Josefa chanchin kan hria, Jakoba fapa duat, a unau ten an itsik vanga an hralh, a leitu ten Aigupta ram Lal Pharoa  hnuaia hotu pakhat Potiphara hnena an hralh, Potiphara nupuiin a ngaihzawn nasat lutuk avanga dawta a hek, tan ina an tan tir, tan Ina a awm laia a tanpuite mumang a hrilhfiah ang takin a thleng dik. Tan ina a tan laiin Aigupta Lal Pharoan mumang a nei a, chumi hrilhfiah tur chuan Josefa chu an ko, mumang pawimawh tak, ṭam tlak tur chungchang, a hmaa  buhbal lo chhekkhawm ṭul thuin a hrilhfiah a. Tichuan Pharoa chuan a ramchhunga mi pawimawh takah a dah ta a. A dinhmun hi tunlai hunah chuan Deputy Prime Minister, Finance leh Agriculture chang kawp a ni ang.

Ram tinah ṭam a tla a, Kanaan ramah chuan ei tur a lo harsa ta. Jakobate chhungkua pawh Aigupta ramah an chhungin an awm phah ta a, Josefa chhungte an nih avangin Pharoa pawhin a ngaihsakin a ti ṭha hle.

Jakoba chu a lo tar ta a, Josefa hnenah chuan a thih hunah a ruang chu Kanaan rama a Pu Abrahama te nupa

te A nu leh pa leh a nupui an phumna Makpela pukah  chuan phum  turin a hmaa  chhia a lo chham tir(Gen.47:31) tawh chu  a hrilh nawn leh a.

Jakoba chuan a fate a kokhawm a, an hmalam huna an awm dan turte sawiin a sawi zawh chuan a thi zui ta a. Josefa chuan nasa takin a pa chu a ṭah a, ṭawih thei lovin ni sawmli chhung an buatsaih a; Aigupta chuan ni 70 lai Jakoba chu an sun a ni.

Aigupta Lal Pharoa rem

tihnain Kanaan rama Jakoba ruang phurh haw zuitute chu an tam awm hle mai

1).Pharoa chhiahhlawh zawng zawng. 2) Aigupta rama upa zawng zawng.(Sorkar hotu leh milian zawng zawng) 3)Jakoba thlahte leh chhungkhat nau pang te te tiam loin. 4).Tawlai- lir leh Sakawr chungchuang mi te. Pawl ropui tak an nia.(Ruang zuitute thlalak pui tur ni ta se,

Ṭum 7 vela lak a ngaih hmel).

# A pa an phum zawh chuan Josefa leh a unaute leh ruang zuitute chu Aigupta lamah an haw leh ta a.

Josefa unaute chuan thil ngaihtuah an nei ta.

1) An pa(Jakoba) a awm tawh si lo, Josefa chuan an lakah phuba a lak an ring.

2) An unau pa hnenah chuan lamkal tirh a "I pa khan i unaute chungchangah,anmahni sualna, i chunga an tih sual phu ba la lova i ngaihdam a duh thu i hnena sawi turin min ti a" tia sawi turin an ti a. An lamkalte chuan Josefa hnenah chuan an sawi chuan Josefa chu a   ṭap ta a. Tin, a unaute pawh chu Josefa hnenah kalin a hmaah an bawkkhup a "i chhiahhlawh te kan nih hi" an ti a.

Josefa chuan a unaute hnenah chuan Hlauthawng suh u, Pathian tlukah ka insiam ngam hlei nem, ka chunga rilru ṭha lo tak in pu kha, hei, tunah Pathianin mi tamtak nungdama an awm theihna hmanruaah a chantir ta a ni, nangmahni leh in fate nen ka chawm zel ang che u a ti a.

Josefa unaute pawh Aigupta ramah chuan an awm ta reng a. A unaute hnenah chuan Josefa chuan ka dam rei tawh lovang, Pathianin a hrereng ang che u, he ram ata  hi Abrahamate, Jakobate leh Isaaka te a tiam ramah chuan a hruai chho ang che u. tiin, tin, chhia a chham tir a, 'chu rama in chhoh hunah chuan  ka ruhte hi chu ramah chuan in hawn dawn nia' a ti a.

Hetah hian Josefa hian Israela thlahte chu Pathianin a tiam Kanaan ramah chuan an la kir leh ngei dawn tih a sawi hi 'Rinna' in a sawi a ni. Tin, Rinna bawkin a thih hnuah a ruhte chu Aigupta rama phum mai lovin Kanaan rama an luh hunah hawn turin thu a pe bawk a ni.

Josefa chu khup 3 hmuin Kum 110 a nihin a thi a, a ruhte chu Israel fa ten Aigupta aṭanga Ramtiam Kanaan an pan huna an hawn turin kuangah an dah ṭha a.

H.Zoliana

RINNA

Hebrai 11:12

Chutichuan mipa pakhat lakah (ani chu mithi ang a ni si a) vana arsite anga tam, tuifinriat kama ṭiau vaivut chhiar sen loh anga tam an lo chhuak ta a.

Pathianin Abrahama hnena a tiam, vana arsi zata a thlahte lo la pung tur chu Sari pawhin, a tiamtu Pathian rinawmna avangin Isaaka a hring a. Hetah hian, mipa pakhat lakah ati kher a, heta mipa atih hi Abrahama a ni a.

Rom 4 : 18 a kan hmuh chu 'Beiseina awm a awm loh pawhin ani chuan beisei takin a ring a, chi tam takte pa a lo nih theih nan' hi a ni.

Beiseina awm a awm loh pawhin Abrahama hi chi thlah turin mithi ang mai ani tawh(kum 100).A taksa thi tawh anga awm chu a ngaihtuah a. A nupui Sari lah chu a hmeichhe nihna phunga fa nei thei rual anih lai pawhin fa nei thei lo (ching) a ni si.

Pathianin Abrahama hnena a thil tiamte lo thlen famkim dan turah hian thil buaithlak angreng tak a awm. Abrahama pawh hian Pathian a hnenah "Ka In a piang Eliezera hi ka rokhawmtu  a ni si  a," (Gen. 15 : 2,3 )  a ti te, "Ismaela hi i hmaah awm thei sela aw" atih pawhin Pathian chuan Ni love, i nupui Sarin fapa a hrin sak zawk ang che, a hmingah chuan Isaaka i sa tur a ni a ti hmiah.

           Khawvel kalhmanga fa neih ngaihna awm tswh lo fapa pek tiama Abrahama a awm, Pathian laka a dilchhut viau hi rinna phatsan ah ngai lem lo ila. Zirtir ten Lal Isua hnenah, Kan rin ti phui deuh ang che

(Luka 17:5)an ti te, Rin leh zual nan (Rom 1:17) ang hian, rinna hi hmasawn zel thei, hmasawn zel tur kan ni.

Tichuan Mihring ngaiha thil ni thei lo tur anga lang chu an hnena Pathian thu tiam Vana Arsite anga tam, tuifinriat kama ṭiau vaivut chhiar sen loh anga tam, Abrahama leh Sari te aṭang ngei chuan an lo chhuak ta a ni. 11:13 Chung zawng zawngte chu rinna neiin an thi ta a, thil tiamte chu chang lovin; nimahsela chung chu hla tak aṭanga hmuin chibai an lo buk lawk tawh a, leiah hian mikhual leh khualzin mai an ni tih an inhriattir tawh bawk a.

Hebrai  Lehkha thawn ziaktu rilruah chuan, " chung zawng zawngte" tih hi, Rinna kawnga mi kalhmasate an awm ngei anga. Chung zingah chuan Abrahama leh Sarite, Nova leh Enoka te, Abela leh Bung 11 a mimal hming a ziak lante an lang lian deuh ngei ang. An hnena Pathianin a tiamte chu an chang famkim hman lo. An ni chuan an rinna phatsan loin he khawvel hi an chhuahsan a ni.

Nimahsela helaia "Nimahsela" hi a thuken tur a lian hle mai, nimahsela naran a nilo. Nimahsela a tihchhan chu, Chung chu hla tak aṭanga hmuin chibai an lo buk lawk tawh a ati anih chu. An dam laiin an chan tur, an thlarau chhandamna ropui zia chu hriain Pathian lawmtlak nun an lo nei tawh, chibai an buk tawh anih chu.

An chibai buk dan hre duh hian ka bei nasa khawp mai a, mahse, thil hi a mak ve khawp mai. Lalpan min hriattir chu la lawm teh asin,Atam berchuan kan hriat nghal anih ka ring. An chibai buk dan chu a lo sawi kiau 'Leiah hian mikhual leh khualzin mai an ni tih an inhriattir tawh' Amen, ava dik ve!!!. Pathian chibai i buk ve ang u. "A chibai buktu ten Thlarau leh tihtak zetin chibai an buk tur ani(Johan4:24). Kan chibai buk dan tur chu a chiang ta. Kan harsat deuh ṭhin a. Leia kan awm chhung hian 'mikhual anga awm a ṭul anih chu' Mikhualnaah chuan kan duham lo. Gas an sem pawhin bur ruak zawng zawng lak vek kan ngaihtuah lem lo. Ration lak theih an au va, kan phi ruai lo. Mikhual nih kan thiam lo tlat. Midang chan aia tam chan loh chuan kan lungawi thei tlat lo.

Rinnaa kan pa Abrahama nun pawh kan hriat tawh kha. Ramtiam Kanaan a thleng a, khawvel thilah a buai chung lo. A kalna apiangah Maicham a siam zel tih kan hria. 'He kan mikhualna ramah hian kan thlen in pa duhdan angin i awm ang u'.

Upa H. Zolia a

TAKSA HLANNA

Kan rawngbawlna awm reng( Dik tak) ani e

1 Thessalonika  5 : 23

Tin, remna Pathian ngei chuan in pumin tithianghlim che u rawh se; tin, in thlarau leh, in rilru leh, in taksa chu,kan Lalpa Isua Krista lokal hunah chuan sawiselbovin, apumin humhim in awm rawh se Taksa hlan dan ṭhaber chu, sual tih nan taksa hmanloh hi a ni

Rom bung 12 : 1 - 2 hi Bible pumpui Genesis aṭanga Thupuan thleng hian chhiar hlawh ber zinga mi ani hial maithei, a pawimawh hle. "Taksa  Rilru leh Thlarau hi pawimawh bik emaw, hlu bik riau awma ngaih tur ani lova, a pathum hian taksa chu  a ni a, Chu chu Inthawinaa  hlan   tur  chu a ni.

             Thuthlung thar huna 'Inthawina' sawi hi Bible ziak hunlai chuan amak lem lo thei a, tun hunah erawh chuan 'inthawi'  tihte hi naupang deuh tan chuan a chiang lo deuh maithei. Hriatfiah har chu ani lo ange. Hetah ngei pawh hian In taksa chu inhlanah ka ngen a che u a ti a. Inthawi chu inhlan tih hian a fiah e.

Tichuan, Pathian lawm tlak ni tura taksa hlanna  atana pawimawh a awm ta a, chung chu:--

1. Inthawina nung Thuthlung Hlui hunah chuan ran thi (nung lo) an hlan ṭhin. Marawhchu a nung chunga hlan kha a rem chiah loh vangin an talh phawt ṭhin a, Pathian hnena an hlan ber chu  nunna tho chu a ni. Heta Inthawina nung atih kher hi chu, , he taksa, vaivuta siam nimahse, a chhunga nunna awm, Thlarau Thianghlim in(chenna) a puma hlan/pek a ni.(1 Kor.6:19) Chu chuan zawng zawng a huam a, hlan  bang a nei lo. Keini inhlan ve hi chuan a ṭhen, a phal tam deuhin a chanve...enge kan an? A puma  hlan ani a duh ni.

2. Inthawina Thianghlim Thuthlung hlui hunah  inthawina atan ran an hman tur an uluk hle, eng ran pawh nise "Hmel hemlo a nih angai. Chutiang aia thianghlim zawk hial, sual pawlh loh, a fir, Thlarau Thianghlima silfai, ngaihtuahna dik hmanga nun hmang, chu tiang taka taksa nun kaihhruai chu inthawina thianghlim atana hmanraw  ṭha chu a ni.

3. Pathian lawmtlak Thuthlung hlui huna Pathian tana an inthawinaahte, halral thil hlanah te Pathian a lawm tlat lo, Thlarau lungchhia, tlinglo   chunga inpekna, khawngaihna bana lo kuangkuahtu thuawih maina (Sam 51 : 16 -- 17). Hriat tel tur chu , Thuthlung hlui hun ang bawkin  Pathian lawmtlak loh inhlanna kawng kan lo zawh ve reng thei. In enngun ang u.

4. Inhlanah min ngen ta a ni. A chunga INTHAWINA NUNG, THIANGHLIM, PATHIAN LAWM TLAK  ni turin Inhlanah ka ngen a che u a tia, kan hlan tur chu kan taksa  kan pumin a ni. Ala tawp lo, pawimawh tak tak ala awm.

1). Khawvel dana awm loh "Roreltute thu awih suh u" tihna a ni lo. Heng, tisa chakna, mit chakna, damchhung ropuina lemah te inhambuai loh ani. (1 Jh. 2 : 17).

2). Rilru thar pu -a danglam Hei hi damchhunga Pathian tana inhlanna tur chu a ni. Hei hi a ṭul tlatna chu, Pathian duh zawng, a ṭha, lawmtlak leh ṭhatfamkima nun hmang tur chuan Danglam ngam a ngai  Kan danglamna turte, a tlangpuiin. A hmalama sawi tawh Inthawina nunga, thianghlimna kawng leh Pathian lawmtlak nun tak nei tura Thlarau thianghlim duhdan anga awm tura inpekna tharte, khawvel ropuina lem leh chakna bawlhhlawh kawng tinreng laka inthiar fihlim nun nei tura beihte, duhamna sual ata talchhuah a, thlarau thianghlim zara Nun dan hlui kalsana a dik apiangte, a thangmawi tur kawng zawh zel tura a ṭhalo bansana DANGLAMNA  KAWNG ZAWH Chung chu kan rawngbawlna awmtak, kan tih ngei ngei tur a ni.

H.Zoliana

RINGTU NUNA PAWIMAWH

Thu hma

26.2.2021 khan kum 71 ka inti ṭan a. Chumi puala sermon tawi 71 thehdarh ve ka tum chu 28.4. ah ka ṭan thei chauh. 71 chu 100 ah pun chhoin vawiin hi 100 -na a ni ve. Naktuk aṭang chuan nitin nilem loin  Pathianin rem atih chuan la chhunzawm zauh zauh turin rilru ka siam a. Min lo chhiar sak tute lawmthu ka hrilh che u a. Tun ṭuma mi hi a fiah lo viau hmel. Pathianin rem a tih chuan kan la thual leh anga.

1.Sual thu leh Sual man thihna: ( 2003 khan DTI neihbawih a training te batch 3 lai kar khat vel zel hun ka han hmanpui ve a. Kan kal hmasak berin Principal Rev Lalsawman "Engthunge in ken le, tawi tetein han sawi ru le" tiin staff ho nen kan inkawm khawmnaah a ti a. Kei chuan  tawi thei angin, "Sual bul kan chhui thiam vak lova, mi zawng zawng misual vek kan ti tawp a, sual man thihna kanti leh mai a..." ka sawilaiin "E, a va ṭha ve, chubak a ngai lo. Sual bul chhui thiam lo speaker, a ṭha e. "Enge in thupui ken ber?" ati leh a "Team thupui Simna hi kan uar hle. Chhandamna hi a thlawn kan ti na a, rinna dawnthleng lo dawh ve a ngai kan ti...Pu Sawma chuan, "a tawk e, Kohhran pawimawhna in sawi bawk dawn nia"tiin minute 30 zet thu a sawi a, a sawi ṭha kher mai. Kan hlawk hle.) Sual thuah chuan thlahtute ang bawkin leia mihring piang tawh phawt chu misual vek kan nih pawm i la(Sam 51:5). Pawm thei lo pawhin Rom 3:9--18 hi mahni inngaihbel hram ila,  chumi hnuah, "Mi zawng zawngin thil an tisual tawh vek a, Pathian ropuina an chang zo ta lo a ni"(Rom 3 : 23). Kan dinhmun dik tak  hi iai ngawt thei kan ni lo.

2. Suala tlukna leh sual hua Pathian Pathianin mihring hmasate hnenah ei tur a siamsak. Ei loh tur pakhat a hrilh a, an ei chuan thihna anih thu a hrilh. Ei theihte an khamloh vang ni lovin mikhual thu awihin an ei. Pathianin a thu a kaltlang pui, mi hrang an lo ni ta. An awmna Eden huan aṭangin a hnawt chhuak.

3. Chhandam ngai mihring leh chhandamna Anmahni siamtu leh enkawltu thuawihlo nupa chu an awmna ngaiah an lut thei tawh lo. Chhanchhuah ngai an ni. Anmahni siamtu chuan a hmangaih leh khawngaihnain a thuawih lote chu chhanchhuah hna thawka nun pe turin a fapa Isua Krista a pe. Chu chu thu mawi "Pathianin khawvel........a fapa mal neih chhun a pe." Chu a fapa chu Chhandamna thlentu a ni ta.

4. Chhandam nih theih dan chu Pathianin a fapa Lal Isua a pek chu... *Amah chu tupawh a ring apiang an boral lohva  chatuana nunna (chhandamna) an neih zawk nan.(Johana 3:16).

5. Rinna avanga khawngaihnaa chhandam Mihring awm mai mai emaw, Lal Isua ring lo te chu Pathianin khawngaihna hmangin a chhandam ngawt lo. Lal Isua chu miin a rin chuan, chu a rin theihna pawh chu Pathian ṭanpuina a ni tawh. Chu a rinna mai  chu Khawngaihna liau liauin Chhandam nan a pawmsak a nih chu. Mi ṭhenkhatin  rinna leh khawngaihna hi enge pawimawh zawk hriat kan tum. An pawimawh ve ve, an ṭang   dun a  ni.  Chhandamna atana thil chi hrang hrang awm chu Khawngaihna avang vek ani thung.

6. Rinna chu enge? Mizo Kristian zingah chuan, Rinna chu Lal leh chhandamtu atan Isua Krista pawm a, a thu awiha Ama duhdan a nun hmang  tura in hlan tawpna hi a ni. ti pawhin a sawi thei.

 7. Khawngaihna chu enge Thiltih leh chetdan in a phu vang ni hauh lova  thil  ṭha leh hlu miin a dawn chu Khawngaihna a ni.

8. Mihring hi ring thei nge thei lo.Ring thei e, "Ring thei pawh kan ni lo tih in rin tir ṭalh tum hi a dik lo.

9. Sim lovin a pianthar theih em?. Kan rin Lal Isua chuan Sim rawh u, Vanram a hnai tawh e tiin a thu hril a ṭan. Kan dam lai ngeia kan sim ngei hi Lal Isuan min duhsak hle.

10.Chhandamna bo thei nge bo thei lo Hei hi chu Nikinni a roreltu chauhin a hria ang. Bo thei lo a nih pawhin, bo thei angin ngaiin hlau leh khurin kan chhandamna atan nun vawng thianghlim ila kan tifuh ang. Kan inthlahdah a, bo thei a lo nih hlauh chuan kan tifuh lo dawn em mai.!!!

H.Zoliana

RINGTU LANCHHUAH DAN

Ringtu kan nihnaah  hian kan thlen chin chinah kan nihna a langchhuak fo ṭhin

Chhunglam zia pawnlama langchhuak chi hnih lo enho ta ila.

1. Lung pal hnawih var 

Tirhkoh Paula an man, Sanhedrin hmaah  thu a sawi, a sawi ṭan chauh a, Puithiam Lal ber Anania chuan a bula mite hnenah Paula kaa ben sak turin a tia. Tin, Paula chuan Anania chu "Nang,   lung  pal   hnawih varpa, Pathianin a beng zawk ang che; nang, dan anga mi ngaihtuah turin i ṭhu a,  Dan lo anga mi ben  tur i ti vei  a ni maw?" a ti a, Paula hian Anania hiPuithiam Lal ber anih a hre lo a, hria pawh nise a thinrim em a, a insum hman lo thei bawk.(ṭhenkhat chuan a hriat an ring).

Kan tana pawimawh ta em em chu, Anania hi Puithiam  naran pawh nilo, Puithiam zingah pawh lal ber ni ngat a nia,   dinhmun   sang   tak,   Lal Isua hunah pawh Sanhedrin Chairman a ni a. Chutiang meuh pawh lung pal hnawih var pawn lama ṭha vur, chhunglam engmah nilo anih theih.

Pathian Kohhran hminga  chanvo ropui tak chang tawh. Hemi  kawnga mahni mawhphurhna pawh lo hlenchhuak ve fo tawh kan ni mai thei,  Pathian ṭihna avanga dik  tak leh chhung lam nun thlarauin a luah vanga nun  sawizawi aṭanga lawm chunga rinawmna nen thawk kan nih loh erawh chuan. keimahni inhre chiah lo mah ila, min hrechiangtu te chuan,' lung pal hnawih var' min ti dawn a ni.

2. Isua hnenah an awm tawh tih an hria

Thinlung   chhung  rila ngaihtuahna leh vei tak neih chuan hmelah a lang chhuak ṭhin a. Nehemia pawhin a chipui Judate tawrhna leh Jerusalem Chhiat tawh thu a hriatin a  hmelah a lang chhuak a, Lal Artazerzia chuan "I dam lo pawh a ni si lo va, engtizia nge lungngai hmel i put chu le?*" a ti hial a ni.(Nehemia 2 : 2). Petera leh Johana ten rawng an bawl ṭan chho kha an rorum hle, anmahni dotu tamtak karah Lal Isua an ṭan tlat. Templea Petera thusawi lai manin Sanhedrin hmaah an hruai, mi pawimawh an kim ani ber. Hemi ṭuma Peteran Thlarau Thianghlim awmpuinain Isua chauh chu Chhandamtu anih thu leh, chu Isua khengbettute chu anmahni chu an nih a sawi piap piap a, a  thu sawi hriate chuan Isua hnenah an awm tawh tih an hria. Kan thu sawi hre ṭhinte hian, leh, kan tui zawng,  leh kan kal ṭhinna hriate hian  kan chanchin hi engtinnge an sawi ang le? Pastor, Upa, Rawngbawlna chanvo pawimawh chelhtute, mi hlim,....kan vai mai hian Isua hna chhunzawmtute angin nge min hmuh ang, .....engemaw hnawih var angin? Keimahni ngei pawh duhsakna tel lovin mark inpe ta ila, enge kan an le?

Tichuan, pawimawh ta ber mai chu Rev Lalfakzualan, 'Kohhran chhunga rinawmna kha nitin  khawsaknaah pawh a langchhuak tur a ni'a tih angin. Mizo Kristian te hian

    1). Kohhran, Biak ina kan rilru putdan leh Committee peng hrang hranga hna thawh kan duhna leh rilru thianghlim  kan put ang hian Politics pindanah pawh   rilru thianghlim pu zel ila.

    2). YMA leh NGO a kan hmalak na kawng hrang hrang hi mimala kan rinna ti tlabal zawng ang nilo hram se.

    3). Mahni thawhchhuah diktak bak neih leh neih tumna hian damchhunga nun inthla hrung a siam avangin chumi  thuhnuaia kun lo hram turin ṭan la  hram ila.

    4).Sum duh uchuakna, lar leh hmingṭhat duh lutukna leh Hmeichhiat mipat kawnga (heng 3) rilru thianghlim Sawisel kailo nih hram tum tlat tur. Heng 3 hi a pawimawh em em ani.

Tirhkoh Paulan, Tlangval Timothea hnenah Engkimah fimkhur la a tih angin, kan NUN hi uluk takin hmang i la. Keimahni leh midangte tan malsawmna thlentu ni turin, Pathian ṭih dekin ngaihtuahna dik, thianghlim Pathian lawmtlakin kan hun leh nun i hmang ang u.

Upa H.Zoliana

PRESBYTERIAN KOHHRAN LUNGPHUM

(The Foundation of Presbyterianism)

- Rev. Thangzauva

Kan thupui hi thupui pawimawh leh ril tak, thûk leh zau tak a ni a; vawi khata sawi zawh kim mai sen rual a ni lo. Tun \umah chuan tlêm azawng chauh kan sawi ang a; chutah pawh Presbyterian Kohhran chungchâng kan sawi hmasa ang a, a dawtah a lungphum.

I. Presbyterian Kohhran:

'Presbyterian Kohhran' tih leh 'Siam\hat Kohhran' tih hi hriat pawlh theih tak a ni a; a tlângpuiin Sap\awng (English) hmanna ramah Presbyterian Kohhran an ti a, Sap\awng hman lohna ramah Siam\hat Kohhran an ti \hin. Mahse Kohhran pakhat John Calvin-a (1509-1564) zirtirna zuitute vek an ni.

1. Presbyterian Kohhran hian \obul pahnih neiin sawi a ni \hin: A \obul hla zâwk chu Grik \awnga Presbuteros (Elder = Upa) tih a ni a. Kum thua upa, mi puitling leh rintlâk, Mizovin 'Vâl Upa' kan tih ang hi a ni. Thuthlung Hlui hunah Judate Inkhawmna In (Synagogues)-te kha Rorêl Upaten an enkawl a. Chung Upate zînga pakhat chu 'Thu pawtchattu Upa' (Ruling Elder) an ti a. Thuthlung Tharah chuan Rorêl Pawl (Sanhedrin) ten ro rêlin member 71 an ni a; Puithiam Lalber chu Chairman a ni. Apostol-te hun lai khân chutiang chuan Kohhran inrelbawlna chu kalpui \hin a ni. Thuthlung Hluia Upa (Elder) chu Thuthlung Thar hunah chuan Presbyter (Vulgate = Senior) an ti. Presbyterian Kohhran \obul chhuitu \henkhat chuan Mosia huna Israelte inawp dan fel tak an neihah khân an chhui lût (cf. Deut. 1:13-15).

A \obul hnai zâwk chu John Calvin-a duan chhuah, puithiamte chauh ni lo, layman te Kohhran nun leh enkawlnaa an tel ve theihna tura kalhmang a duan chhuah hi a ni a; Siam\hat Kohhranin kum zabi 15-17 chhûnga a hrin chhuah a ni deuh ber.

2. Presbyterian-ho ti-Presbyterian-tu chu thurin ni lovin, Kohhran inawp khawm dan leh rorêlna indawt chhawng an nei hi a ni (Pastor Bial Inkhawmpui, Presbytery, Synod, General Assembly). Chu chu an ngai pawimawh a, an inchhuan vena \hin pawh a ni. A duang chhuaktu John Calvin-a pawhin inrelbawl dan fel a awm loh chuan Kohhran ding theiin a ring lo. Hei hian Kohhran inrelbawlna fel pawimawhzia leh a thlarauzia a tilang.

3. Presbyterian Kohhran chuan hotu nghet pahnih a nei - Pastor-te leh Kohhran Upate. Pastor-te chu Kohhran thlarau lam nun chawmtu (Tirh. 20:28; Pet. 5:2) leh zirtirtu tih an ni ber a (Eph. 4:13). Kohhran Upate chu rorêl Upa (Ruling Elders) an vuah (Tirh. 6:1-6). Hetianga sawi ni mah se, rawngbawlnaah thawk dun, in\anpui tawn an ni.

4. Presbyterian Kohhran kalhmang hi Bishop nei Kohhran leh Tualchhung Kohhran thuneihna (Congregational) inkâra awm, Thuthlung Thar Kohhran inrelbawl dan hnaih bera ngaih a ni: Kohhran hi Krista taksa a nih hriain, Kohhran lû - Isua Krista lalna leh thuneihna tundinnaa ngaiin kalpui a ni. Kohhran aiawha thlan leh ruat, Pastor leh Upaten Kohhran enkawlna hi an kalpui deuh ber a. Jerusalem Council method hmanga duan a ni. Lal Isua hnîak hnung zuiin, Kohhran Administration chelhtute - Pastor leh Upate chu chhiahhlawh rilru pua an mawhphurhnate hlenchhuak tura beisei an ni.

5. Presbyterian Kohhran chuan rawngbawlna kawngpui chi hnih a nei: (i) Rawngbawlna tihmâkmawh (Essential Ministry) leh (ii) Rawngbawlna \angkai (Beneficial Ministry).

i. Nemngheh Rawngbawlna (Ordained Ministry) chu rawngbawlna tihmâkmawh tiin rawngbawlna laipui berah a dah a; thu leh Sacrament rawngbawlna tih a ni. Hei hi tirhkohte hun a\anga inhlanchhawn zêl (Apostolic Succession) nia a pawm avangin nemngheh chang tawhte (I Tim. 4:14) kut a\ang chauhvin nemngheh thar tur pawh an awm tur niin a pawm.

ii. Rawngbawlna \angkai (Beneficial Ministry) tia sawi chu mipui rawngbawlna (Lay Ministry) hi a ni a. Hei hian rawngbawlna dang zawng zawng a huam avangin '\angkai' tih a ni. Kohhran Upa te pawh Ordained ni mah se hetah hian rin luh a ni. Ordained Minister zîngah leh Upa zîngah pawh sâng bik emaw, hniam bik emaw an awm lo ve ve.

6. Presbyterian Kohhran chu rorêl khawmna hmanga inkaihruai Kohhran a ni: Mipui aiawha rorel khawmna (Democratic form of Government) hmanga inkaihruai a ni. Huho thuneihna (Collective Leadership) kalhmang zui a ni. Jerusalem Inkhawmpuiah Tirhkohten, "Thlarau Thianghlim leh keinin..." (Tirh. 15:28) an ti ang khân, Thlarau Thianghlim ngaichang chunga ngun taka an rêl hova thutlûkna an siam chu him berin an hria. Rorelnaa thusawiah leh vote-ah an intluk tlâng vek a, Pathian aw ngaithla turin mipuite an fuih bawk \hin.

7. Presbyterian Kohhran chu Thurin hmanga inkaihruai Kohhran a ni: Thurin a ngaipawimawh hle a. Bible leh Siam\hat Kohhranten an uar thurin chu Kohhran \hanna leh humhalh nan an vuan tlat a. Chu thurin chu hmangin hun thar zêla ngaihdan leh zirtirna lo chhuak te chu a dik leh dik loh an lo teh \hin a ni.

II. Presbyterian Kohhran Lungphum:

Sam ziaktu chuan, "A lungphum chu tlâng thianghlimah te chuan a awm" (Sam 87:1) a ti a. Mizoten tlâng thianghlim tia kan rilruin a kawh chu, 'Kalvari tlâng', misualten Pathian khawngaihna avanga Chhandamna kan channa hmun, Lal Isua Krista thihna hmun kha a ni. Kha Kalvari tlânga Pathian Fapa Isua Krista thî-a tak kha Kohhran-ho lungphum chu a ni. Hla siamtu hian a sawi chiang hle, "Kan Kohhranho lungphum chu a lal Krista Isua" (KHB. No. 361.1) tiin. Tirhkoh Paula chuan, "Krista Isua ngei chu a kila lung pawimawh ber niin, tirhkohte leh zawlneite lungphum chunga sak in ni," a ti bawk (Eph. 2:20). A chunga kan sawi hian Presbyterian Kohhran chauh ni lovin, khawvela Kohhran pumpui lungphum a sawinaah pawh ngaih tur a ni.

Presbyterian Kohhran nihphung duang chhuaktu John Calvin-a chuan Kohhran a duannaah lungphum panga a phum a, chungte chu: (i) Rinna chauh (Sola fide), (ii) Khawngaihna chauh (Sola gratia), (iii) Pathian thu chauh (Sola Scriptura), (iv) Krista chauh (Sola Christus) leh (v) Pathian ropui nan chauh (Sola deo Gloria).

A. Kohhran Chanchina a lan dan: Presbyterian Kohhran lungphum, Kohhran chanchina a lan dan lo sawi diat diat ila:

1. Bible hi rinna leh thiltih tehna dik lo thei lovah a pawm: Bible hi kan rinna leh thiltih tehna dik lo thei lo, sual thei lo a ni.

2. Mimal duhthlanna zalên (free will) a pawm: Pathian thu zirtirna pawm leh hnawl thuah te, rin duh leh duh loh thuah te - Pathianin mimal duhthlanna a zahsak a, a tilui lo. Mi tin rorêl saka la awm tur pawh a pawm.

3. Apostol-te thuvawn leh Westminster thurin a pawm: Hengte hi rinna tehna belhchhahna \angkai takah a pawm.

4. Thu leh Sakramen rawngbawlna a ngaipawimawh: Thuhril hi Pathian biak inkhawmah a dah pawimawh hle - Pulpit dah danin a tilang. Sakramen chu pawn lam chhinchhiah hmuh theih leh chhung lam thlarau \hatna a ti. Sakramen hlawkna chu Krista malsawmna avang leh rinnaa changtuah thlarauvin a thawh avanga lo awm a ni a ti bawk.

5. Ringtu zawng zawng puithiamna a pawm: Pathian hnen kan thlen theih nan, Puithiam lalber Isua Kristan Kraws-a a inhlanna azârah lal leh puithiamah min pawm a (1 Pet. 2:9), Pâ hnên luh theihna kan lo nei ta a (Heb. 10:19, 20; Thup. 1:6; 5:10). Puithiamte kaltlang khera Pathian hnena sual puan emaw, \awng\aisak kher emaw kan ngai tawh lo; mi tinin Pa hnen thlen theihna kan lo nei ta; direct-in Pathian kan be pawp thei vek.

6. Kohhran a dah pawimawh: Kohhran chu Krista taksa a ni a, a lû chu Krista a ti a. Hmuh theih leh hmuh theih loh Kohhran a pawm a, a thliar lo va, a inzawm tih a pawm. Kohhran chu pakhat, thianghlim, huapzo leh Apostol-te din chhuah a ni tih a pawm. Kohhran chuan Trinity ringin a pawm a; kohhran chu Krista avanga chhandamna changtute inpawlkhawmna hi a ni. Pawl thianghlim a ni a, khawvel nun sual laka inthiarfihlim a, nun leh rawngbawlnaa Pathian chu a laipui bera dah tlat tura kohchhuah a ni.

7. Zalên taka Pathian biakna a pawm: Ringtuten zalen taka, Mahni irâwm chhuaka Pathian biak hi Presbyterian Kohhran ze ken a ni. Chutih laiin inkaihhruaina erawh chu a zah a, tihsual laka vengtu a siam hi a hmang \angkai hle. Mizoram Presbyterian Kohhran chu phuahsa hmang leh tlachawpa kalho inkârah a kal.

8. Rawngbawltu 'Minister' intluktlânna a pawm: Minister-te hi sâng bîk emaw, hniam bîk emaw an awm lo, an intluk tlâng vek a ni tih a pawm. Chutih laiin rawngbawltu Junior-in Senior zahna a lantir lo tur tihna a ni lo va; chutiang bawkin Pastor Senior chuan Junior-te Kohhrana an rawngbawlnaa an thiltih \hate zaha ngaihhlut sakin a \ulnaah kaihruaia \anpui tur an nih inhria se a \ha.

9. Laymen rawngbawlna a dah pawimawh: Rorel inkhawmna leh thu ngaihtuahnaah Kohhran Upate dah pawimawh hi Presbyterian ze langsar tak a ni. Upa-ah pawh pawimawh bik leh pawimawh lo bik, hniam bik leh sâng bik an awm lo - an inchen vek. Dan zawhkim zawng zawngin kawng hrang hrangin Kohhranah pawimawhna an nei.

10. Kohhran inthununna:  Inthununna hi Kohhran chakna thahrui a ni an ti \hin. Thununna hi Kohhran vawn thianghlim nan leh suala tlute chhanchhuah leh nan lainatna thinlung nena tih a ni. Kohhran inthununna hi Krista zah vanga tih a ni. Kohhran lu chu Krista a ni a; thu leh thiltiha Krista leh a thu phatsantu chu a taksaah tuar theih rual a ni lo.

B. Pathian thu zirna (Theology) a\anga thlira a innghahna lungphum (Theological perspective of Presbyterianism)

1. Rinna thupuana a nghahchhan: Kohhran chu Krista taksa (Eph. 1:23, Kol. 1:18) inpêng tawn vek kan ni (Eph. 5:30). Westminster thurinah a innghat thui hle. A thupui pawimawh \henkhatte chu - Pathian, thilsiam, tlûkna sual, thuthlung, Krista remna siamtu, duhthlanna zalên, Kohna, thiamchantirna, thianghlimna, rinna, inlamlêtna, thil \ha tih, Khawngaihna, Pathian dan, Kristian zalenna, Pathian biak, Inawpna, Kohhran, Sakramen, thihna, rorelna etc. te hi a ni.

2. Pathian thua a innghahnate: Bible-a innghat rinna a pawm a (2 Kor. 13:5; Heb. 11:6 etc.) Thuthlung Hlui leh Thuthlung Thar bute hi rinna leh thiltih tehna dik lo thei lovah a pawm. Krista aiawh emaw, Kohhran aiawh emaw-a inngai chuan Krista a zah lo a ni. Kohhran hi khawvêla Pathianin pawl thianghlim a din awmchhun, Pathian leh mihring intawhna hmun leh a inchawimawina hmun a ni.

3. Trinity a pawm: Pathian pakhatah minung pathum - Pa leh Fapa leh Thlarau Thianghlim a pawm a. Hmuh theihah inpuangin a inhriattir - Siamtu leh tlantu nihnain.

4. Pathian lalberna: Engkim chunga Pathian lalberna leh thuneihna hi rin dan leh pawm dan khaifelna hnukpuiah a nei. "Pathian lalberna chu dan chungnung ber a ni a; Pathian chuan a thupêk a chhuah a, a tih tur leh tih loh tur chu a duh angin a hlenchhuak tawp mai a ni," Calvin-a chuan a ti (Inst. 1.16.8).

5. Chhandamna: Chandamna chu Pathian khawngaihna avang chauhva lo awm a ni, chu pawh chu Thlarau Thianghlim azara neih a ni. Chhandamtu atan Krista chauh a pawm, 'Min chhandam tur hming dang reng a awm lo' (Tirh. 4:12).

6. Mihring bawhchhiatna: Mihring hi sualin fanchhuak vek mah se sual lo thei lo chu a ni lo - a duhthlanna tihchhiat a nih loh avangin. Chutih laiin Pathian khawngaihna \anpuina tel lo chuan ama duhthlanna ringawt chuan rinna a\anga thil \ha tih chu a hlawh chhuak zo lo. Mihring chuan Thlarau puihna avang chauhvin a kotu kohna a chhang thei a ni tih hi Calvin-a zirtir dan a ni. Thlarau Thianghlim \anpuina a ngaihpawimawh êm avangin Thlarau Thianghlim mithiam (Theologian of the Holy Spirit) tih a hlawh phah hial a ni.

7. Thlarau Thianghlim: Presbyterian Church of India-in Thlarau Thianghlim chungchang Thurin a puan chhuah hi a lo bulpui hle (Thurin No. 6). Presbyterian Kohhran Thurin duangchhuaktute chuan chungnung a\anga Thlarau Thianghlimin Mihring chhûngnung lama a thawh - mihring nun rawn tidanglama rawn siamthar \hin chhandamna hi an ngai thutak hle.

8. Thuthlung fa: Presbyterian Kohhranho chu Pathian chhandamna thuthlun pakhat pawmtu an ni. Chhandamna atan Isua Krista chauh an pawm a, chu chhandamna chang tur chuan rinna chauh an hmachhuan a, an chan theihna chhan chu khawngaihna avang chauh a ni tih an puang.

9. Rinna: Rinna mai chuan thiltihtheihna emaw, phu rêngna emaw a nei lo. 'Rinnain thiam min chantir' tia kan sawi hian kan phu reng vang tihna a ni lo va, Krista felna kan chan theih nan a hmanrua a ni kan tihna a ni (Inst. 3.18.8).

10. Ruatlâwk thu (Predestination): Ruatlawk thu hi a ngial a nganin Presbyterian Kohhran kal zêlte hian pawm lo mah se, tlêm tidanglamin an pawm deuh vek. Mihring duhthlanna chu Pathianin a thlanna leh a ruatna kawnga sulsutu pawimawh tak a ni (cf. Rom 8:29) (Ruatlawk chu-'Kan tân naupang a lo piang a, fapa pekin kan awm ta (Isa. 9:6) tih anga a thlen hmaa hmuh lâwk thil sawina a ni). Pathian chuan chatuan ata a chhandam tur leh chhandam loh tur pawh a hmu lawk vek a ni (NB: PCI chuan Ruat lâwk thu hi thurinah a telh lo).

11. Pathian thu dan: Pathian thu dan chu dan chungnung, a tawpkhawk a ni. Pathian chuan a duhzawng chu a ti mai - hnial phâk tu mah an awm lo. 'I tum dal rual a awm lo' (Joba).

12. Hun hnuhnung: Hun hnuhnung chungchanga Presbyterian Kohhran thurin chu tuna kan Kohhran (PCI) thurin No. 10-na nen a la inang zel a ni.

13. Pathian biakna: Pathian biak inkhawm Worship inkhawm ah chuan Pathianin hmun laili (God Centre) a changa, inpawl hona fellowship inkhawmah chuan mihringin hmun laili (Man-Centred) a chang thung. Fellowship-ah chuan a betuten an hlimna leh an nuam tih zawng an zawng ber thin. Pathian chu Pathian thu buin a sawi ang zêla biak tur a ni. Thlarauva, thutaka biak tur a ni. Chumi awmzia chu Pathian pawlna, chhungrila Pathian biakna tihna a ni. Pathian chu thlarauvin a tih thar thinlung puin, khawvel leh tisa duhzawng ngaihtuah lovin, tihdan tinrêng Bible tlawh chhan fel tak neiin biak tur a ni. Revivalist Pathian biaknaah chuan Pathian thutaka din tlat aiin miten nuam an tih dan leh an phurna an zui chiam thei. Chutiang hmunah chuan Spurgeon-an, "Beram an chawm nge kel an chawk phur?" a tih kha kan fimkhurna tur a ni ang.

14. Kohhran rawngbawlna: Kohhran rawngbawlna chu mithianghlimte \hat tlanna leh hmasawnna tura inzirtirna a ni ber. Paula chuan Kohhran rawngbawlna chu mipaah a khûr khung deuh bîk a (1 Tim. 2:12). Presbyterian Kohhran \henkhatte erawh chuan hmeichhiate pawh Kohhran Upa hna an chelhtir a ni (Rom. 16:1; 1 Tim 3:11).

C. Thil pawimawh dangte

1. Sorkar leh Kohhran: Kohhran leh Sorkar chu \ang dun, hnathawh hrang si a ni. Kohhran chuan Sorkar a tithianghlim ang a, Sorkarin Kohhran a humhim ang. He ngaih dan hi Bible thu zirtirna leh Kristian khawtlâng nunhona kalphung nen pawh a inmil a; ram tina Presbyterian Kohhran pawm dan a ni.

2. Presbyterian Khawvel thlir dan: Presbyterian Kohhran chuan Pathian chu engkim chunga lalber a nihna (Sovereignty of God) a\angin thil a thlir a; a thu hnuaiah engkim a awm a ni tih a hria. Isua Krista chu hnam nun zia luhchilha siam\hat hna thawktu (Christ Transforming Culture) a nih hriain, chu hna chhunzawm chuan rawng a bawl. Pathian rinna chu culture chunga awm a nih a pawm a; hring nun khawvela siam \hat ngai apiang siam \hatu ni tura dah a ni tih a pawm a; khawvel hi Krista lalna ram atana thawk turin a ding tih a hria (Thup. 11:15).

Tlangkawmna

Kan sawi takte kha Presbyterian Kohhran nihphung hriltu - a lungphum a ni a. Pathian lalnaa innghatin, Krista rilru pua lungphumin, Bible thutakah dingin, Pathian ram zauna tura beiin, inawp dan fel tak a nei a; chu chuan Kohhran a tichakin a tingheta, Pathian rawng bawl turin chak takin ke a pentir theih phah a ni. A innghahna lungphumah hian a la innghat zel em tih hi Kohhran kal zelin a inbih chian fo a ngai ang. Pastor-te leh Upate rorel hona Kohhranah hian a inrelbawlna a pawimawh ang bawkin khawvel siam \haa chenna tlâka buatsaih a, Krista tana sengkhawm hi a rawngbawlna pawimawh ni zel tur a ni.

Lehkhabu rawnte (Bibliography):

1. Livingstone, E.A : The Concise Oxford Dictionary of the Christian Church . Oxford University                                         Press : 1977.

2. Presbyterianism (With Special Reference to the Presbyterian Church of India) : Published by the        Presbyterian Church of India : 1993.

3. Lalsawma, Rev : Kristian Thurin zirna : 1998 (1999 Puitling Sunday School zir).

4. Vanlallawma, C : Kan la Presbyterian zel em? Kristian Tlangau Centenary Souvenir; Published by                                   SL&PB : 2011.

5. Remthanga, Rev. H : Mizoram Presbyterian kalphung. Synod Worship Seminar Paper                                                            (Unpublished).

6. Lalthanmawia, Rev. R : Political Education in a tum. Seminar Paper on Political Education;                                                       Published by Mizoram Synod Social Front Committee : 1991.

7. Thangzauva, Rev : Rawngbawlna _ 'Article' : 2017 (Unpublished).

8. Vanlalauva, Rev. Dr. H : 'Keynote Address : Reformation Kum 500-na lawmna. Organised &                                                       Published by Aizawl Theological College : 2017.

9. Lianzuala, Rev. C : Presbyterian Lungphûm phûmtute. Published by J.D. Press, Kulikawn : 1990.

Ka Pa, anni hi ngaidam rawh

Thupui : Ka Pa, anni hi ngaidam rawh

Chhiar tur : Luka 23:34

                                                                                                                                                -Rev.Thangzauva

Kan thupui,'Ka Pa,anni hi ngaidam rawh' tih hi Lal Isua Kraws-a an khenbeh laia a thusawi pasarih zinga pakhat a ni. Sual reng reng hre lo leh thil tihsual nei lovin amah khengbettute tan a Pa Pathian hnenah ngaihdam a  dilsakna a ni.

1. Kraws-a khengbettute dinhmun:

            Persia-ho chuan lei chu Pathian siam a ni a, Van pawh Pathian awmna a ni an ti. Chuvangin misual thi tlaka an ngaihte chu lei si lo, van si lovin Kraws-ah an khengbet thin. Rom-ho chuan Rom mi ni lo -bawih leh sal te, tual that te, suamhmang te, phiarruk hmang te, khua leh tui nihna phatsantu te leh hel hote hrem nan Kraws an hmang thin. ( John L.Mc Kenzie, Dict.of the Bible. p.161). Mosia dan chuan 'Thinga khai apiang Pathian anchhedawng a ni si a' a ti (Deut.21:23). Kraws chu dam lai pawha thi tlaka an ngaihte hremna hreawm leh zahthlak bera an ngaihte thihna hmun a ni. Kraws-a khenbeh ve mi pakhat  chuan,"Keini zawng hrem zia reng kan ni, kan thiltih man chauh hmu kan nih hi" a ti a ( Lk.23:41). Pilata pawhin a sualna a hmu chuang lova; chuti chungin Kraws-ah khenbeh a ni. Zawlnei Isaia chuan," Kan khawlohnate avangin vuak thitlinin a awm ( Isa.53) a ti.

2. Ka Pa, anni hi ngaidam rawh:

            Vawi khat chu Nigeria rama Tualchhung indo laiin mi pakhat hi a nung chungin phum an tum a; amah phumna  tur 'thlan' an laih tir a. A phumtute chu anchhia a lawh nasa hle a ni an ti. Kan Lalpa chu amah khengbettute tan a tawngtaisak a, "Ka Pa, anni hi ngaidam rawh, an thiltih hi an hre lo a nih hi,' tiin (Lk.23:34). Rom-ho danah chuan mi an khenbeh chuan,' Ka thihna hi ka thiltih sual tlanna ni rawh se' tia tawngtai tura ngaih an ni. Isua erawh chu mi dangte sual tlan nan a thi a. 'Ka Pa, anni hi ngaidam rawh' tih hi a Grik tawnga a awmze diktaka lehlin chuan ,'Ka Pa, anni hi ngaidam rawh tiin a tawngtai mawlh mawlha' tihna a ni. Kraws-a khenbeh a nih lai pawh khan Isua chuan mite sual ngaihdam an nih theih nan a tawngtai avangin Kraws-a khenbeh mek a dinglama mi chuan Pathian ngaihdamna a chang a, Paradise-ah a chawl nghal. Chu Pathian Fapa thihna chuan kan sual kaidum ber pawh a silfai ve nghal thei: 'Kan sualte thupha kan chawi chuan kan sualte ngaidam tur leh, kan fellohna zawng zawng tlengfai turin amah chua a rinawmin a fel a ni (1Jn.1:9)

3. Pathian ngaihdamna chuan hmangaih Pathian a nihzia a tilang:

           

            Tirhkoh Paula chuan,'Kan bawhchhiatnate min ngaidam a; batna lehkha,thupeka ziak kan chunga awm, min dodal thina chu a thaibo tawh si a. Chu ngei chu Kraws-a khengbetin a lakiang ta a, a ti ( Kol.2:13,14). Min ngaidam chauh pawh a ni lo; misual thiam loh chang tawh hnu kha thiam min la chantir zui cheu nia! Bawhchhiatna sual avanga thiam loh chang tawh hnu,'thiam lo hmin der hnu' kha a Pa Pathian hmaah kan aiawha dingin thiam kan chan theih nana min sawisaktu a ni. Thiam chantirtu kha Krista a ni sia a, tuin nge thiam loh chantir ang? Thil tisualtu thiam chantir hi mihringin a ti thei lo. Sawrkar rorelna Court pawhin a ti ngai lo. Keini erawh chuan ukil ropui Isua Krista, min sawisaktu kan nei. A hming pawh 'Remruattu Maka! (Wonderful Counsellor) a ni. Chuti taka hmangaih avanga nunna min petu chu hla siamtu pawhin," A hmangaihna a chak a ni," a ti thlawt. Hla siamtu dang pawhin a sawi thiam dan berin - 'Chuti takin min hmangaiha' a ti. Hmangaih avanga misual ngaihdamna hi sawifiah phak a ni lo.

                                             'A hmangaih thukzia puang turin,

                                              Seraf-te pawhin an phak lo' (KHB.No.184).

4. Pathianin min ngaidam ang bawkin, midangte kan ngaidam ve tur a ni:

            Missionary ropui C.T. Studd-a (1862-1931) chuan " Isua Krista hi Pathian a niha, ka tan a thi a nih si chuan a tana inhlanna thuk lutuk a awm thei lo," a ti. Mi dangte tana inpekna thuk zo a awm thei lo. Lal Isuan tawngtai dan min zirtirnaah chuan," Kan chunga thil tisualtute kan ngaidam angin, nang pawhin kan thil tihsual ngaidam ang che," a ti. "Mi an bawhchhiatte in ngaihdam chuan, in Pa vana miin a ngaidam ve ang che u. Nimahsela, mite in ngaihdam siloh chuan, in Pain in bawhchhiatte a ngaidam bik lo vang". Biang lehlama bengtu chu lehlam pawh dawh rawh a la ti ta zel a ni. Thil tisualtuin ngaihdam a dil chuan vawi sarih hmun sawmsarih (7x70=490) ngaidam turin min zirtir ; a tul zat zat, vawi engzat pawh tihna a ni a. 'Pathianin Kristaa a ngaidam che u ang bawkin nangni pawh inngaidam ve rawh u' tiin Tirhkoh Paula pawhin min hrilh bawk. Isuan mi a ngaihdam chu a theihnghilh thak, a hre zui ve ngai lo.

            Khengbettu, sawiseltu, sawisatu, tihchhiatvek duhtu, tihhlum tumtute Isuan a tawngtaisak,"Ka Pa, anni hi ngaidam rawh" tiin. Pathian ngaihdamna changtute hian mi dang kan ngaidam ve tur a ni a, chu chu Isua rilru, hmelmate hneh dan tha ber a ni.

                                                   Lalpan a thu malsawm rawh se.