Ka room kawngkhar an rawn beng ri dawt dawt a, ka nu chuan ring leng lawng hian Mama tho rawh, dar 5 a ri tawh nia! a rawn ti a, ka nau zin tur thlah a ngai lek chu niin. Mit ek awm ang ang te chu kheuh thla mawlh mawlh pah chuan kan thu hlawl mai a, thawhphan mutchhuah hi a lo awm chawk a niang chu thu tum luau chung chuan tlem kan lo chhing leh hman peka. Zing tian ar khuang min kaitho tu tur awm lo mah se ka Phone a dar ri ka kam chuan min ti harh ta tho a. Nizan lamah te ka lo dil tawh angin zing khaw var engmawi tak, tuma la hmuh ngaih hauh lo hmu tur a ka ngenna tih hlawhtlin an ni chu ka lawm kher mai. Zing ni chhuak nen hian kan intawng ngai meuh lo, tuk dangah hi chuan hmuh phak lovah hian a lo lawn sang leh hman thin; chu a chhapah ka pianchamphaphak a lo ni kher bawk nen, lawmna a thuah hnih kher mai. Ka insiam sawk sawk a, ka nau zin tur thlah tur chuan kan chhuak ta a.
Kan tho hma ve fê a maw tih pawh hian keini aia tho hma hi an lo la tam khawp mai, a then phei chu an mu ve ngai lo emaw tih mai tur an ni. Kan Bible in “Mut thlahlel suh, i lo pachhe dah ang e” a tih kha an zawm tha phian a ni mahna. Mahse in lian pui pui chhûngah khum nuam tak takah hian an lo mu thei lo zawk emaw ni! Hausa te mut a lo tui leh zel ten hringnun hi a fair nang kan ti dawn, he hringnun mahni tawk te te a chapo ve ar hian a ngai bik law; retheih nawm chang te pawh hi a awm a nia. Inlukhûp chunga a thim chhûng mu thei tan chuan a va thlákhlelh awm em. Mahse mahni theih ang tawk tawka kan thawh chhuahah tui ti taka kan mut theih chuan chu tluka thil hlu a awm lo, kawmchhak eiru pa in lian a lo tlák kan hlau ngawt te a nih loh chuan.
Mitmeng phak chep chuap a tlan chhuak tih takah khawhmuh a fiah lo ruai a, zing luphut thak pawh hiat reh hman mang lo na na chu helmet la thlain kan han hiat nawk nawk a, ka phurh pa lah chuan mi a ring ve fú tho mai. Thui pawh kan tlan lo tihah chuan kan scooty chu vawi leh khatah a hnung a nem ang mai hian a kawi zawr mai a, mangan khatna_ka nau mangang meng phawk leh engnge ni ang ti a kan han ngaihtuah chuan a ke a lo thep lek chu niin, a buaithlak duh khawp mai, Taxi lak tum a kan inremfel lai chuan City bus a rawn kal hlauh mai a (sum save), ka nau chu a lawn tharh a, mahni buaina mual mualah kan buai dawn a ang ta hle mai. Ka lo thawh hma zia ka hriatchhuah na chu khang a bul hnaia lirthei siamna nei ho kha tumah an la tho lo reng reng. A ke siamna a awm mai loh a vangin kan veng lam pan chuan ka inkhalh thla ta a. Khalh ngil a har ber awm e.
Mite ta ang pha ve lo mah se in lama ka sangha khawina bawm chei ka ngai tih hre reng chungin kawng chhak lama PWD ho lung lakkhawm sa chu a ruk thei ang berin ka la a, hmel lang lo thei ang ber tur chuan kan kûn deuh hram hram a, mahse motor-a chuang a piang chuan min hmu leh ang lawi si, chu achhapah kawng sir a ka scooty din tir chu a tlu thal tawp mai, thi chiang ngei mai _mangan hnihna. Hmanni lawka carbon fibre ka bel tir an thler hawk mai a, chutah a side glass an bung rawp bawk a, hlep chu a chhe ve khawp mai. Vawin chu ka tluang dawn lo a va ang ve ti a inngaihtuah chungin ka duh khawp lung chu ka la ta tho a, a ke tai tuang tuang chung chuan kan tlan zel a, RL_building bulah chuan ka dah ta a.
Hun te a lo inher liam zel a, tuk dang ang lo takin ruah chu a sur cherh cherh a, chawlh tuk te chu nise lu lam leh ke lam hre lék lova mut a chakawm khawp mai ti rilru nauh nauh pah chuan ka scooty ke siam tur chuan tuk dang aiin ka chhuak hma ta a. Ka siam tumna dawr a lo inhawng mai bawk si lo, a mangan thlak duh khawp mai. An dawr banga Ph. No. fiah vak lo a inziak chu kan hmet chhuak a, “Aw, ka rawn chhuk mek e” tiin min chhang a; rei nangian kan nghah hnu chuan a rawn thleng ta a... “Nangmah mi scooty ke siam ngai, pu dam lo va” a rawn ti zung zung mai a. Pa pakhat tawngpai ve tak, Mizo hmel pu si hi a ni a, a hmel kan en khan “Pu Tawma” hmel hmu tlat hian ka inhria! Wrench min pe a, “Kha nang man herh rawh” a ti ta mai; mi office kal tur best dress leh piancham kawr thar té nen inlak chhiat loh nak laiin a ke hnung chu kan herh ta tuih tuih mai a. Mahse engkim hi a lo tha vek mai, tawnhriat kan neih belh zel a, kan nitin hun hman a thiam neih belh miah lova hun hman hi ka hlauh zawng tak a ni bawk reng a ni. Tichuan thiam ang ang chuan kan han herh ve naw naw a, tlan theih chuan ka rem khawm ve thei ta a.
Ka hringnuna ka nin leh tih loh theih si loh chu zun ram hi a ni. Kha tih hunlai khan lungte pawh hum ila min chhandam kher hian ka ring lo, chu a chhapah lirthei an la ding sek leh nghal, in kawng a va thui duh ngai ve le; kawng sawrh chu a dim thei ang ber a tlan zel chung chuan sailung var chungah ngei chuan ka thu ta kuk a. “Thihna hi nun nei tura kailawn a ni a, nung tura ka thih theih nan...” tih thu chhiar chung zel chuan duh tawk ka ngah ta a. Thlan sa te an reh hnu chuan Office lam chu theih anga rangin ka pan ta vang vang a.
Tuk dang ang lo takin ka tho hma a, ka piancham a ni a, thil hi thar deuh vuk tur a ka lo suangtuah na chu engmah lo mai a ni. Mi ngai, rim ngai té té bak an lo ni lo, hmanhmawh leh thlahlel taka chét nan chuan an va ho lua e tih ka ngaihtuah lai tak chuan heng mite vang ni lovin ka rawngbawl ve naah ka ngaih vang zawk a lo ni e.